ചണ്ഡീഗഢ്: പഞ്ചാബിലെ പട്യാല ജില്ലയിലെ രാജ്പുരയ്ക്ക് സമീപം റെയിൽവേ ട്രാക്കിൽ ചെറു സ്ഫോടനം ഉണ്ടായതായി റിപ്പോർട്ട്. ഇന്ന് പുലർച്ചെയായിരുന്നു സംഭവം നടന്നത്. സ്ഫോടനത്തെ തുടർന്ന് പാളത്തിന് ചെറിയ കേടുപാടുകൾ സംഭവിച്ചു. ട്രാക്കിൽ വിള്ളലുകൾ ഉണ്ടായതായി റെയിൽവേ ഉദ്യോഗസ്ഥർ അറിയിച്ചു. സംഭവം നടന്ന സമയത്ത് ട്രെയിനുകൾ പാതയിലൂടെ കടന്നുപോകാത്തതിനാൽ വലിയ ദുരന്തം ഒഴിവായി.
സംഭവത്തിന് പിന്നാലെ ആ പാതയിലുള്ള ട്രെയിൻ ഗതാഗതം താൽക്കാലികമായി നിർത്തിവെച്ചു. അംബാല–ലൂധിയാന റൂട്ടിലെ ട്രെയിനുകൾ വിവിധ സ്റ്റേഷനുകളിൽ തടഞ്ഞു. സംഭവസ്ഥലത്ത് പോലീസും ബോംബ് സ്ക്വാഡും റെയിൽവേ പ്രൊട്ടക്ഷൻ ഫോഴ്സ് സംഘവും പരിശോധന നടത്തി. സ്ഫോടനത്തിന് പിന്നിൽ അട്ടിമറി ശ്രമമുണ്ടോ എന്ന് ദേശീയ അന്വേഷണ ഏജൻസി ഉൾപ്പെടെ അന്വേഷണം ആരംഭിച്ചു.
ട്രാക്ക് അറ്റകുറ്റപ്പണികൾ പൂർത്തിയാക്കിയ ശേഷം ഗതാഗതം പുനഃസ്ഥാപിക്കുമെന്ന് അധികൃതർ അറിയിച്ചു. സ്ഥലത്ത് നിന്ന് സ്ഫോടക വസ്തുക്കളുടെ അവശിഷ്ടങ്ങൾ കണ്ടെത്തിയതായും അവ പരിശോധനയ്ക്ക് അയച്ചതായും പോലീസ് വ്യക്തമാക്കി. പ്രദേശത്ത് സുരക്ഷ ശക്തമാക്കിയിട്ടുണ്ട്.
