മലപ്പുറം: മലപ്പുറത്ത് കോൺഗ്രസ് എംഎൽഎമാർക്കായി സംഘടിപ്പിച്ച സ്വീകരണ പരിപാടിയിൽ പാർട്ടിയിലെ വിഭാഗീയത പരസ്യമായി പ്രകടമായി. ജില്ലയിൽ മുഴുവൻ സീറ്റുകളിലും നേടിയ ചരിത്രവിജയത്തിന്റെ ഭാഗമായി സംഘടിപ്പിച്ച സ്വീകരണച്ചടങ്ങിലാണ് വി.ഡി. സതീശൻ–കെ.സി. വേണുഗോപാൽ വിഭാഗങ്ങൾ തമ്മിലുള്ള ഭിന്നത പ്രകടമായത്.
എഐസിസി സംഘടനാ ജനറൽ സെക്രട്ടറി കെ.സി. വേണുഗോപാൽ ഉദ്ഘാടനം ചെയ്ത ചടങ്ങിൽ പ്രചാരണ ബോർഡുകളിൽ ഉൾപ്പെടെ മുഖ്യമന്ത്രി വി.ഡി. സതീശന്റെ ചിത്രം ഉണ്ടായിരുന്നില്ല. മൂന്ന് എംഎൽഎമാരുൾപ്പെടെയുള്ള പ്രധാന നേതാക്കളുടെ പ്രസംഗങ്ങളിലും മുഖ്യമന്ത്രിയുടെ പേര് പരാമർശിക്കപ്പെട്ടില്ല.
തിരഞ്ഞെടുപ്പ് വിജയത്തിൽ വി.ഡി. സതീശന്റെ പങ്ക് ചൂണ്ടിക്കാണിക്കാതെ കെ.സി. വേണുഗോപാലിനെ പ്രശംസിക്കുന്നതിലായിരുന്നു വി.എസ്. ജോയ്, ആര്യാടൻ ഷൗക്കത്ത്, എ.പി. അനിൽകുമാർ എന്നിവർ ശ്രദ്ധ കേന്ദ്രീകരിച്ചത്. കെ.സി. വേണുഗോപാൽ തന്നെ പ്രത്യേകമായി പിന്തുണച്ച നേതാവാണെന്ന് വി.എസ്. ജോയ് പറഞ്ഞു. നിലമ്പൂർ ഉപതിരഞ്ഞെടുപ്പിൽ മത്സരിക്കാൻ അവസരം നൽകിയതും കെ.സി. വേണുഗോപാലാണെന്ന് ആര്യാടൻ ഷൗക്കത്ത് വ്യക്തമാക്കി.
നൗഷാദ് അലിയുടെ മറുപടി
അതേസമയം, വി.ഡി. സതീശൻ പക്ഷത്തുള്ള പൊന്നാനി എംഎൽഎ കെ.പി. നൗഷാദ് അലി പ്രസംഗത്തിൽ കെ.സി. വേണുഗോപാലിനെ പരാമർശിച്ചില്ല. വി.ഡി. സതീശൻ സർക്കാരിന് ശക്തിപകരണമെന്നതായിരുന്നു നൗഷാദ് അലിയുടെ പ്രസംഗത്തിലെ പ്രധാന ആവശ്യം.
സ്വീകരണച്ചടങ്ങിൽ തന്നെ ഇരു ചേരികളുടെയും നിലപാടുകൾ പ്രകടമായത് കോൺഗ്രസിനുള്ളിലെ വിഭാഗീയത കൂടുതൽ ചർച്ചയാകുന്നതിന്റെ സൂചനയായാണ് വിലയിരുത്തപ്പെടുന്നത്. വരുംദിവസങ്ങളിൽ സതീശൻ–വേണുഗോപാൽ വിഭാഗങ്ങൾ തമ്മിലുള്ള ഭിന്നത പാർട്ടിക്കുള്ളിൽ കൂടുതൽ ചർച്ചയാകാനും സാധ്യതയുണ്ട്.




