കണ്ണൂർ: കെപിസിസി പ്രസിഡന്റിന്റെ പേരിൽ പ്രചരിച്ച വ്യാജകത്തുമായി ബന്ധപ്പെട്ട കേസിൽ കെ. സുധാകരന്റെ മരുമകൻ അജിത് കുമാറിനെ പൊലീസ് ചോദ്യം ചെയ്തു. സൈബർ പൊലീസാണ് ചോദ്യം ചെയ്തത്. തിരഞ്ഞെടുപ്പ് സമയത്താണ് ഈ വ്യാജകത്ത് പ്രചരിച്ചത്. കണ്ണൂരിൽ കെ. സുധാകരന് ജയസാധ്യത ഇല്ലെന്നായിരുന്നു കത്തിലെ ഉള്ളടക്കം.
സണ്ണി ജോസഫ് എഐസിസിക്ക് അയച്ച കത്ത് എന്ന പേരിലാണ് ഇത് പ്രചരിച്ചത്. സംഭവത്തിൽ കെപിസിസി പ്രസിഡന്റിന്റെ പരാതിയെ തുടർന്ന് സൈബർ പൊലീസ് കേസ് രജിസ്റ്റർ ചെയ്തിരുന്നു. കത്ത് പ്രചരിപ്പിച്ചവരുടെ മൊഴിയുടെ അടിസ്ഥാനത്തിലാണ് അജിത് കുമാറിനെ ചോദ്യം ചെയ്തതെന്ന് പൊലീസ് അറിയിച്ചു. അന്വേഷണം തുടരുകയാണ്.
