തിരുവനന്തപുരം : സംസ്ഥാനത്തെ 1,458 സർക്കാർ ജീവനക്കാർ ചട്ടങ്ങൾ മറികടന്ന് സാമൂഹിക സുരക്ഷാ പെൻഷൻ കൈപ്പറ്റുന്നതായി കണ്ടെത്തി ഇൻഫർമേഷൻ കേരള മിഷൻ. ധനവകുപ്പിന്റെ നിർദേശ പ്രകാരമായിരുന്നു പരിശോധന.
കോളജ് അസിസ്റ്റന്റ് പ്രഫസർമാരും ഗസറ്റഡ് ഉദ്യോഗസ്ഥരും അടക്കമാണ് അനർഹമായി പെൻഷൻ കൈപ്പറ്റുന്നതെന്ന് വ്യക്തമായിട്ടുണ്ട്. ഹയർ സെക്കൻഡറി വകുപ്പിൽ ജോലി ചെയ്യുന്നവരും ഇതിലുൾപ്പെടും.
അനധികൃതമായി കൈപ്പറ്റിയ പെൻഷൻ തുക പലിശയടക്കം ഇവരിൽ നിന്ന് തിരിച്ചു പിടിക്കാനാണ് ധന വകുപ്പ് നിർദേശം നൽകിയിരിക്കുന്നത്. കുറ്റക്കാർക്കെതിരെ കർശന അച്ചടക്ക നടപടി സ്വീകരിക്കുമെന്നും ധനമന്ത്രി കെ.എൻ. ബാലഗോപാൽ അറിയിച്ചു.
