ആലപ്പുഴ: ഹരിപ്പാട്ട് സ്വകാര്യ വസ്ത്ര വ്യാപാര സ്ഥാപനത്തിന് മുന്നിലുണ്ടായിരുന്ന പെട്ടിക്കട അനധികൃതമായി പൊളിച്ച സംഭവത്തിൽ പൊലീസ് കേസെടുത്തു. ഹരിപ്പാട് നഗരത്തിലെ ശ്രീവത്സം എന്ന വസ്ത്ര വ്യാപാര സ്ഥാപനത്തിന്റെ അധികൃതരാണ് കടയ്ക്ക് മുന്നിൽ പ്രവർത്തിച്ചിരുന്ന നാട്ടുകാരനായ അശോകന്റെ പെട്ടിക്കട പുലർച്ചെ പൊളിച്ചു നീക്കിയത്. സംഭവത്തിന് പിന്നാലെ നാട്ടുകാരുടെ പ്രതിഷേധം ശക്തമായി. തുടർന്ന് പൊലീസ് ഇടപെട്ട് ചർച്ച നടത്തി. ചർച്ചയിൽ പൊളിച്ചുമാറ്റിയ പെട്ടിക്കട പുനർനിർമിച്ച് നൽകാമെന്ന് ശ്രീവത്സം ഗ്രൂപ്പ് സമ്മതിച്ചു.
പൊലീസ് സ്റ്റേഷനിൽ നടത്തിയ ചർച്ചയിലാണ് പ്രശ്നത്തിന് പരിഹാരം കണ്ടെത്തിയത്. അതേസമയം, സംഭവത്തെക്കുറിച്ചുള്ള ചോദ്യങ്ങളോട് ആഭ്യന്തര മന്ത്രി രമേശ് ചെന്നിത്തല പ്രതികരിച്ചില്ല. വിഷയം തന്റെ ശ്രദ്ധയിൽപ്പെട്ടിട്ടില്ലെന്നാണ് മന്ത്രി അറിയിച്ചത്.
