ബംഗളൂരു: സംസ്ഥാന സര്ക്കാര് ജീവനക്കാര് ‘മാന്യമായ’ വസ്ത്രം ധരിക്കണമെന്ന് സര്ക്കുലര് പുറത്തിറക്കി കര്ണാടക സര്ക്കാര്. സര്ക്കാരിന്റെ പ്രതിച്ഛായക്ക് കോട്ടം വരുത്തുന്ന വസ്ത്രങ്ങള് ധരിക്കരുതെന്നും മുന്നറിയിപ്പ് നല്കി.
വിവിധ വകുപ്പ് മേധാവികള്, ഡെപ്യൂട്ടി കമ്മീഷണര്മാര്, മുഖ്യമന്ത്രിയുടെ ഓഫീസ്, അഡീഷണല് ചീഫ് സെക്രട്ടറിമാര്, പ്രിന്സിപ്പല് സെക്രട്ടറിമാര്, സെക്രട്ടറിമാര്, ജില്ലാ പഞ്ചായത്ത് ചീഫ് എക്സിക്യൂട്ടീവ് ഓഫീസര്മാര് എന്നിവര്ക്കാണ് സര്ക്കുലര് അയച്ചത്. ഏതൊക്കെ വസ്ത്രം ധരിക്കാന് പാടില്ല എന്നതില് വ്യക്തത വരുത്തിയാണ് പേഴ്സണല് അഡ്മിനിസ്ട്രേഷന് ആന്ഡ് റിഫോംസ് വകുപ്പ് (DPAR) കമ്മ്യൂണിക് കത്തയച്ചത്.
സംസ്ഥാന സര്ക്കാര് ഓഫീസുകളിലെ ചില ജീവനക്കാര് മാന്യമല്ലാത്ത വസ്ത്രം ധരിക്കുന്നതായി പൊതുജനങ്ങളില് നിന്നും സംഘടനകളില് നിന്നും ഡിപിഎആറിന് പരാതികള് ലഭിച്ചിട്ടുണ്ടെന്ന് സര്ക്കുലറില് പറയുന്നു.
ജീവനക്കാര് മാന്യമായ വസ്ത്രം ധരിക്കണമെന്ന് പറഞ്ഞിട്ടുണ്ടെങ്കിലും പലരും നിര്ദ്ദേശങ്ങള് പാലിക്കുന്നില്ലെന്നും കത്തില് വ്യക്തമാക്കി.
കോര്പ്പറേറ്റ് ഓഫീസുകളില് നിന്ന് വ്യത്യസ്തമായി, സര്ക്കാര് ജീവനക്കാര്ക്ക് ഡ്രസ് കോഡ് ഇല്ല. എന്നിരുന്നാലും, ചില യുവാക്കള് കോളേജ് വിദ്യാര്ത്ഥികളെപ്പോലെ വസ്ത്രം ധരിക്കുന്നു.
ഇത് സ്വീകാര്യമല്ല. അവര് കീറിയ ജീന്സുകളും സ്ലീവ്ലെസ് വസ്ത്രങ്ങളും വളരെ ഇറുകിയ വസ്ത്രങ്ങളും ധരിക്കുന്നുവെന്ന് ഉദ്യോഗസ്ഥര് പറഞ്ഞു.
കര്ണാടക സ്റ്റേറ്റ് ഗവണ്മെന്റ് എംപ്ലോയീസ് അസോസിയേഷന് പ്രസിഡന്റ് സി.എസ്. ഷഡക്ഷരി ഈ നീക്കത്തെ സ്വാഗതം ചെയ്തു. ഒരാളുടെ വസ്ത്രധാരണം മറ്റുള്ളവരെ ബുദ്ധിമുട്ടിക്കുന്നതാകരുതെന്നും സര്ക്കാര് ഓഫീസുകളില് മാന്യത പാലിക്കണമെന്നും അദ്ദേഹം പറഞ്ഞു.
