ബംഗളൂരു: മലയാളികളുടെ യാത്രാക്ലേശം പരിഹരിക്കാന് നടപടികളുമായി കെഎസ്ആര്ടിസി. ഓണത്തോടനുബന്ധിച്ചുള്ള അധിക ഷെഡ്യൂളുകള് ഇന്ന് മുതല് സര്വീസ് നടത്തും. പുതുതായി വാങ്ങിയ എസി സ്ലീപ്പറുകള് ഉള്പ്പെടെയാണ് ഓണക്കാലത്ത് സര്വീസ് നടത്തുക.
ട്രെയിനില് ടിക്കറ്റില്ല. സ്വകാര്യ ബസ് സര്വീസുകളുടെ ടിക്കറ്റ് കൊള്ള. ഉയര്ന്ന വിമാന നിരക്ക്. ഓണക്കാലത്ത് നാട്ടിലെത്താന് ആഗ്രഹിക്കുന്ന മലയാളികളെ അലട്ടുന്ന യാത്രാ പ്രശ്നങ്ങള്ക്ക് പരിഹാരം പ്രഖ്യാപിച്ചിരിക്കുകയാണ് കെഎസ്ആര്ടിസി. ബംഗളൂരുവില് നിന്നും മൈസൂരുവില് നിന്നും നാട്ടിലേക്ക് പ്രഖ്യാപിച്ച സര്വീസുകള് ഇന്ന് മുതല് ഓടിത്തുടങ്ങും. പുതുതായി കെഎസ്ആര്ടിസിയുടെ ഭാഗമായി മാറിയ പ്രീമിയം ബസുകള് മുതല് സൂപ്പര് ഫാസ്റ്റ് ബസുകള് വരെ ഇക്കൂട്ടത്തിലുണ്ട്.
കൊട്ടാരക്കര, തിരുവനന്തപുരം, കോഴിക്കോട്, എറണാകുളം, ആലപ്പുഴ, കോട്ടയം ഡിപ്പോകളിലേക്ക് അധിക സര്വീസുകള് ഉണ്ടാകും. നിലവില് ബംഗളൂരുവില് നിന്ന് കേരളത്തിലേക്ക് ഓപ്പറേറ്റ് ചെയ്യുന്ന 49 ഷെഡ്യൂളുകള്ക്ക് പുറമേയാകും ഈ ബസുകളുടെ സര്വീസ്. ബസുകളില് ഫ്ലെക്സി നിരക്കുകള് ബാധകമായിരിക്കുമെന്ന് കെഎസ്ആര്ടിസി പ്രഖ്യാപിച്ചിട്ടുണ്ട്. എന്നാലും തോന്നുംപടി നിരക്ക് ഈടാക്കാറുള്ള സ്വകാര്യ ട്രാവല് ഏജന്സികളുടെ നിരക്ക് വച്ച് താരതമ്യം ചെയ്യുമ്പോള് ഇത് കുറവായിരിക്കുമെന്നാണ് അധികൃതരുടെ വിശദീകരണം.
