കൊച്ചി: ‘മോളിവുഡ് ടൈംസ്’ സിനിമയുടെ പ്രദർശനവുമായി ബന്ധപ്പെട്ട് സെൻസർ ബോർഡ് നൽകിയ പരാതിയിൽ കഴമ്പുണ്ടെന്ന് പോലീസ്. സിനിമ സെൻസർ ചെയ്ത ഭാഗങ്ങൾ മാറ്റമില്ലാതെ തിയറ്ററിൽ പ്രദർശിപ്പിച്ചതായി അന്വേഷണത്തിൽ വ്യക്തമായി.
കണ്ണൂർ പയ്യന്നൂരിലെ ഒരു തിയറ്ററിൽ പോലീസ് നടത്തിയ പരിശോധനയിൽ, സെൻസർ മാറ്റങ്ങൾ പാലിക്കാതെ സിനിമ എട്ട് ദിവസം പ്രദർശിപ്പിച്ചതായാണ് കണ്ടെത്തൽ. സെൻസർ ചെയ്ത ഭാഗങ്ങൾ വീണ്ടും ചേർത്തതിന്റെ തെളിവുകളും ലഭിച്ചതായി പോലീസ് അറിയിച്ചു.
അഭിനവ് സുന്ദർ സംവിധാനം ചെയ്തും നസ്ലെൻ നായകനായും ജൂൺ 5-ന് പുറത്തിറങ്ങിയ ചിത്രമാണ് ‘മോളിവുഡ് ടൈംസ്’. സെൻസർ ബോർഡ് ഒഴിവാക്കിയ അശ്ലീല സംഭാഷണങ്ങൾ ഉൾപ്പെടെ തിയറ്ററിൽ പ്രദർശിപ്പിച്ചതായാണ് പരാതി.
സിനിമയുടെ സംവിധായകൻ, നിർമ്മാതാവ്, ഡിസ്ട്രിബ്യൂട്ടർ, ഡിജിറ്റൽ ക്രിയേറ്റർ എന്നിവർക്കെതിരെയാണ് കേസ് എടുത്തിരിക്കുന്നത്. ഇവർക്കായി പോലീസ് നോട്ടീസ് നൽകി വിശദീകരണം ആവശ്യപ്പെടും. മൂന്ന് വർഷം വരെ തടവോ പിഴയോ ലഭിക്കാവുന്ന കുറ്റമായതിനാൽ കേസ് കൂടുതൽ ശ്രദ്ധ നേടുകയാണ്. അന്വേഷണം തുടരുന്നതായി പോലീസ് അറിയിച്ചു.
