ടെൽ അവീവ്: ഒക്ടോബർ 27ൽ നടന്ന ഇസ്രയേൽ തിരഞ്ഞെടുപ്പിന് മുന്നോടിയായി പ്രധാനമന്ത്രി ബെഞ്ചമിൻ നെതന്യാഹുവും അദ്ദേഹത്തിന്റെ വിശ്വസ്തനായ മൊസാദ് മേധാവി റോമൻ ഗോഫ്മാനും ഇറാനെതിരെ ഒരു വൻ സൈനിക നീക്കത്തിന് ശ്രമിച്ചിരുന്നെന്ന വിവരം വെളിപ്പെടുത്തി ഇസ്രയേലി മാധ്യമം.
ഇസ്രയേലി സുരക്ഷാ വിഭാഗത്തിലെ മറ്റ് മുതിർന്ന ഉദ്യോഗസ്ഥർ ഈ നീക്കത്തെ പിന്തുണച്ചില്ല. ഇത് വലിയൊരു സംഘർഷത്തിന് കാരണമാകുമെന്നും തിരഞ്ഞെടുപ്പിനെ ബാധിക്കുമെന്നും അവർ മുന്നറിയിപ്പ് നൽകി. അതിനാലാണ് മുന്നറിയിപ്പുകൾ അവഗണിച്ച് രഹസ്യനീക്കത്തിനായുള്ള പദ്ധതികളുമായി നെതന്യാഹുവും മൊസാദ് മേധാവിയും മുന്നോട്ട് പോയത്. ഒടുവിൽ, ഇസ്രയേലി സുരക്ഷാ ഏജന്റുമാരിൽ ഒരാൾക്ക് സംഭവിച്ച അബദ്ധം മൂലം ഈ നീക്കത്തെക്കുറിച്ച് അമേരിക്കയ്ക്ക് വിവരം ലഭിക്കുകയും അവർ പെട്ടെന്നുതന്നെ ഇടപെട്ട് ആക്രമണ പദ്ധതി തടയുകയും ചെയ്തുവെന്ന് ചാനൽ 12 റിപ്പോർട്ട് ചെയ്തു.
നെതന്യാഹുവിന്റെ കടുത്ത വിമർശകനും മുൻ പ്രധാനമന്ത്രിയുമായ എഹൂദ് ബാരകും ഇക്കാര്യം ഒരു അഭിമുഖത്തിൽ വെളിപ്പെടുത്തിയിട്ടുണ്ടെന്ന് ചാനൽ 12 പറയുന്നു. എന്നാൽ, ഇസ്രയേൽ പ്രധാനമന്ത്രിയുടെ ഓഫീസ് റിപ്പോർട്ട് നിഷേധിച്ചു. ഇസ്രയേൽ തിരഞ്ഞെടുപ്പിന് മുമ്പുള്ള ഒരു ആക്രമണം അജണ്ടയിൽ ഇല്ലായിരുന്നുവെന്ന് പ്രധാനമന്ത്രി തന്നെ വ്യക്തമാക്കിയതാണെന്ന് അവർ പറയുന്നു.
ഇസ്രയേൽ തിരഞ്ഞെടുപ്പിന് രണ്ട് ദിവസം മുമ്പ് നെതന്യാഹുവും ഐഡിഎഫ്(ഇസ്രയേൽ ഡിഫൻസ് ഫോഴ്‌സ്‌) ചീഫ് ഓഫ് സ്റ്റാഫ് ഇയാൽ സമീറും തമ്മിൽ തർക്കം ഉണ്ടായതായും ചാനൽ 12 നേരത്തെ റിപ്പോർട്ട് ചെയ്തിരുന്നു. ഇറാനെതിരെ സൈനിക നടപടിക്ക് പ്രധാനമന്ത്രി നൽകിയ നിർദ്ദേശത്തെത്തുടർന്നായിരുന്നു ഇത്. അതിന്റെ തുടർച്ചയായിരുന്നു ഈ സംഭവമെന്നും റിപ്പോർട്ടിൽ പറയുന്നു.
