തിരുവനന്തപുരം: പാറശാലയിലെ പരശുവയ്ക്കൽ മേലെകോണം ഇടനാട്ടുകോണം ക്ഷേത്രത്തിൽ മോഷണശ്രമം നടത്തി രക്ഷപ്പെടാൻ ശ്രമിച്ച വയോധികനെ പൊലീസ് പിടികൂടി. ക്ഷേത്രമതിൽ ചാടി അകത്ത് കടന്ന പ്രതി ഭണ്ഡാരം കുത്തിത്തുറന്ന് കാണിക്കപ്പണവും വിളക്കുകളും ഉൾപ്പെടെ മോഷ്ടിക്കാൻ ശ്രമിക്കുകയായിരുന്നു. എന്നാൽ നിറപുത്തരി ദിനമായതിനാൽ ക്ഷേത്രത്തിലെ ജീവനക്കാർ പതിവിലും നേരത്തെ എത്തിയതോടെ മോഷണശ്രമം കണ്ടെത്തി.
ജീവനക്കാർ ചോദ്യം ചെയ്തതോടെ പ്രതി ഓടി രക്ഷപ്പെടാൻ ശ്രമിച്ചു. തുടർന്ന് നാട്ടുകാരുടെ സഹായത്തോടെ ഇയാളെ കീഴ്പ്പെടുത്തി പാറശാല പൊലീസിന് കൈമാറി. പ്രതിയെ പിടികൂടുന്നതിനിടെ ഇയാൾ പൊലീസിനുനേരെയും ആക്രമിക്കാൻ ശ്രമിച്ചതായി പൊലീസ് അറിയിച്ചു. തുടർന്ന് ബലപ്രയോഗത്തിലൂടെയാണ് ഇയാളെ കസ്റ്റഡിയിലെടുത്തത്.
ചോദ്യം ചെയ്യലിൽ പ്രതി പരസ്പരവിരുദ്ധമായ വിവരങ്ങളാണ് നൽകുന്നതെന്ന് പൊലീസ് പറഞ്ഞു. സംഭവത്തിൽ കൂടുതൽ അന്വേഷണം നടത്തി പ്രതിയെ വിശദമായി ചോദ്യം ചെയ്യുമെന്ന് പാറശാല പൊലീസ് അറിയിച്ചു.
