തിരുവനന്തപുരം: നിയമസഭാ തിരഞ്ഞെടുപ്പ് ഫലം വരാനിരിക്കെ സംസ്ഥാനത്ത് ഇടതുപക്ഷ സർക്കാരിനും മുഖ്യമന്ത്രിയായ പിണറായി വിജയനുമെതിരെ ശക്തമായ ജനവികാരം നിലനിൽക്കുന്നുണ്ടെന്ന് രാഷ്ട്രീയ നിരീക്ഷകൻ അഡ്വ. എ. ജയശങ്കർ. ഇത്തവണത്തെ വിധി എൽഡിഎഫിന് എതിരായിരിക്കുമെന്നാണ് അദ്ദേഹത്തിന്റെ വിലയിരുത്തൽ. കഴിഞ്ഞ ലോക്സഭാ തിരഞ്ഞെടുപ്പിലും തദ്ദേശ തിരഞ്ഞെടുപ്പുകളിലും സർക്കാരിനെതിരായ ഈ വികാരം പ്രകടമായിരുന്നുവെന്നും, ജാതിമത വ്യത്യാസമില്ലാതെ സർക്കാർ മാറണമെന്ന നിലപാടാണ് ജനങ്ങളിൽ ഉള്ളതെന്നും അദ്ദേഹം പറഞ്ഞു.
രണ്ടാം പിണറായി സർക്കാരിന്റെ ഭരണം മോശമല്ലെങ്കിലും ചില മന്ത്രിമാരുടെ പ്രവർത്തനം ജനങ്ങളിൽ പരിഹാസ്യമായി മാറിയതായി അദ്ദേഹം വിമർശിച്ചു. ഒന്നാം സർക്കാരിന്റെ കാലത്ത് വീഴ്ചകൾ പോലും നേട്ടങ്ങളായി കാണിക്കാനായപ്പോൾ, രണ്ടാം സർക്കാരിന്റെ കാലത്ത് നല്ല കാര്യങ്ങൾ പോലും തെറ്റായ രീതിയിൽ ജനങ്ങളിലേക്ക് എത്തിയതായി അദ്ദേഹം ചൂണ്ടിക്കാട്ടി. നവകേരള സദസ്സ്, ലോക കേരള സഭ പോലുള്ള പരിപാടികൾ നടക്കുമ്പോൾ, ആശാവർക്കർമാർ നടത്തിയ സമരത്തെ അവഗണിച്ചതും ജനങ്ങളിൽ അസന്തോഷം വർധിപ്പിച്ചുവെന്നും അദ്ദേഹം പറഞ്ഞു.
യുഡിഎഫിന് 80 മുതൽ 90 വരെ സീറ്റുകൾ നേടാൻ സാധ്യതയുണ്ടെന്നും, എൽഡിഎഫ് വിരുദ്ധ വോട്ടുകൾ യുഡിഎഫിനും ബിജെപിക്കും ഇടയിൽ വിഭജിക്കപ്പെടാമെന്നും അദ്ദേഹം വിലയിരുത്തി. ചില പ്രദേശങ്ങളിൽ ബിജെപി ശക്തമായതിനാൽ കോൺഗ്രസിന് പകരം ബിജെപിക്ക് വോട്ട് ചെയ്യുന്ന പ്രവണതയും ഉണ്ടാകാമെന്ന് അദ്ദേഹം കൂട്ടിച്ചേർത്തു. പത്ത് വർഷം ഭരിച്ച സർക്കാരിനെതിരായ സ്വാഭാവികമായ വിരോധം ഇത്തവണത്തെ തിരഞ്ഞെടുപ്പ് ഫലത്തിൽ പ്രതിഫലിക്കുമെന്നതാണ് അദ്ദേഹത്തിന്റെ നിഗമനം.
