തിരുവനന്തപുരം: പ്രിയദർശിനി പദ്ധതിയിലൂടെ 60 കോടി രൂപയുടെ നഷ്ടമുണ്ടായതായി ഗതാഗത മന്ത്രി സി.പി. ജോൺ പറഞ്ഞു. ഈ നഷ്ടം സർക്കാർ നേരത്തെ തന്നെ കണക്കുകൂട്ടിയതാണെന്നും അദ്ദേഹം വ്യക്തമാക്കി.
കൂടുതൽ പ്രിയദർശിനി ബസുകൾ സർവീസിനിറക്കാൻ നിലവിൽ ആവശ്യത്തിന് ബസുകളില്ലെന്ന് മന്ത്രി പറഞ്ഞു. എംഎൽഎമാരുടെ ഫണ്ടിൽ നിന്ന് ഓരോ ബസ് വീതം വാങ്ങുന്ന സംവിധാനം കൊണ്ടുവരാൻ ആലോചനയുണ്ടെന്നും അദ്ദേഹം അറിയിച്ചു. എക്സ്പ്രസ്, ഫാസ്റ്റ് പാസഞ്ചർ സർവീസുകളും പ്രിയദർശിനിയാക്കണമെന്നാണ് ആഗ്രഹമെങ്കിലും ഇപ്പോൾ അതിന് സാഹചര്യമില്ലെന്നും മന്ത്രി പറഞ്ഞു.
ഓൺലൈൻ ടാക്സി ഡ്രൈവർമാരുടെ സമരത്തെക്കുറിച്ചും മന്ത്രി പ്രതികരിച്ചു. വാഹന മേഖലയിലെ നിക്ഷേപകരുടെയും തൊഴിലാളികളുടെയും പ്രശ്നങ്ങൾ സർക്കാർ പരിഗണിക്കുമെന്നും വിവിധ മേഖലകളെ പ്രോത്സാഹിപ്പിക്കാൻ ശ്രമിക്കുമെന്നും അദ്ദേഹം പറഞ്ഞു.
ലക്സ്വറി ബസുകൾ ഉടൻ സർവീസിലിറക്കുമെന്നും എന്നാൽ വലിയ തോതിൽ പുതിയ ബസുകൾ വാങ്ങുന്നത് സർക്കാരിന്റെ നയമല്ലെന്നും മന്ത്രി വ്യക്തമാക്കി. നിലവിലുള്ള ബസുകൾ പരമാവധി ഉപയോഗപ്പെടുത്താനാണ് ശ്രമമെന്നും അദ്ദേഹം പറഞ്ഞു.
സംസ്ഥാനത്ത് പുതിയ റോഡ് സുരക്ഷാ യജ്ഞം ആരംഭിക്കുമെന്നും അതിന്റെ ഭാഗമായി സീബ്രാ ലൈനുകളുടെ വീതി വർധിപ്പിക്കുമെന്നും മന്ത്രി അറിയിച്ചു. വാഹന മോഡിഫിക്കേഷൻ വിഷയത്തിൽ നിയമപരമായി അനുവദിച്ച കാര്യങ്ങൾ മാത്രമേ ചെയ്യാവൂ എന്നും അനുവദിച്ച ഇളവുകൾ ദുരുപയോഗം ചെയ്യരുതെന്നും മന്ത്രി മുന്നറിയിപ്പ് നൽകി.
ബസുകളിൽ പുറത്തേക്ക് സ്പീക്കർ ഘടിപ്പിച്ച് ഉച്ചത്തിൽ ശബ്ദം ഉപയോഗിക്കുന്നത് അപകടങ്ങൾക്ക് കാരണമാകുന്നുണ്ടെന്ന് ചൂണ്ടിക്കാട്ടിയ മന്ത്രി, ഇത്തരം സ്പീക്കറുകൾ ഉടൻ നീക്കം ചെയ്യണമെന്നും അല്ലെങ്കിൽ നിയമനടപടി സ്വീകരിക്കുമെന്നും മുന്നറിയിപ്പ് നൽകി.
