തൃശ്ശൂർ: വ്യാജ സ്വർണക്കട്ടി കാണിച്ച് പണം തട്ടിയ കേസിൽ ‘കെജിഎഫ് സ്വാമി’ എന്നറിയപ്പെടുന്ന പ്രതി അറസ്റ്റിൽ. പത്തനംതിട്ട സ്വദേശിയായ ഷാജിയാണ് പൊലീസിന്റെ പിടിയിലായത്. കൊടുങ്ങല്ലൂരിൽ വാടകയ്ക്ക് താമസിച്ചുവരികയായിരുന്നു ഇയാൾ.
ഖനിയിൽ നിന്ന് നേരിട്ട് സ്വർണം എത്തിച്ചുനൽകാമെന്ന് വിശ്വസിപ്പിച്ച് ഒരു പ്രവാസി മലയാളിയിൽ നിന്ന് അഞ്ച് ലക്ഷം രൂപ തട്ടിയെടുത്തതായാണ് കേസ്. വിപണിവിലയെക്കാൾ കുറഞ്ഞ നിരക്കിൽ സ്വർണം ലഭിക്കുമെന്ന വാഗ്ദാനത്തിൽ വിശ്വസിച്ചാണ് പ്രവാസി പണം നൽകിയത്.
അറസ്റ്റിലായ ഷാജിയിൽ നിന്ന് പൊലീസ് വ്യാജ സ്വർണക്കട്ടിയും കണ്ടെടുത്തു. പരിശോധനയിൽ ഇത് ഇരുമ്പ് കഷണത്തിൽ സ്വർണനിറം പൂശി യഥാർഥ സ്വർണക്കട്ടിയെന്ന രീതിയിൽ തയ്യാറാക്കിയതാണെന്ന് കണ്ടെത്തി.
സംഭവത്തിൽ കൂടുതൽ അന്വേഷണം തുടരുകയാണെന്ന് പൊലീസ് അറിയിച്ചു.
