ന്യൂഡൽഹി: ശബരിമല യുവതീപ്രവേശന കേസിൽ സുപ്രീംകോടതിയുടെ ഒമ്പതംഗ ഭരണഘടനാ ബെഞ്ചിന്റെ വിധി ഒക്ടോബർ ആദ്യവാരത്തോടെ ഉണ്ടാകുമെന്ന സൂചന നൽകി ചീഫ് ജസ്റ്റിസ്. ക്ഷേത്ര പരിപാലനവുമായി ബന്ധപ്പെട്ട ബോധ്ഗയ കേസ് പരിഗണിക്കുന്നതിനിടെയാണ് ചീഫ് ജസ്റ്റിസിന്റെ നിർണായക പരാമർശം.
ശബരിമല കേസിലെ വിധി പുറത്തുവന്നതിന് ശേഷം ബോധ്ഗയ കേസ് പരിഗണിച്ചാൽ മതിയെന്ന് അഭിഭാഷകൻ കോടതിയോട് ആവശ്യപ്പെട്ടിരുന്നു. ഇതിന് മറുപടിയായാണ് ശബരിമല കേസിൽ വിധി ഒക്ടോബറിൽ ഉണ്ടാകുമെന്ന് ചീഫ് ജസ്റ്റിസ് വ്യക്തമാക്കിയത്. തുടർന്ന് ബോധ്ഗയ കേസുമായി ബന്ധപ്പെട്ട ഹർജി ഒക്ടോബർ ആറിന് പരിഗണിക്കാമെന്നും കോടതി അറിയിച്ചു.
ശബരിമല യുവതീപ്രവേശനവുമായി ബന്ധപ്പെട്ട നിയമപ്രശ്നങ്ങൾ പരിഗണിക്കുന്നതിനായി രൂപീകരിച്ച ഒമ്പതംഗ ഭരണഘടനാ ബെഞ്ചിന്റെ വിധി ഏറെ നിർണായകമാണ്. ക്ഷേത്രങ്ങളിലെ ആചാരങ്ങൾ, മതസ്വാതന്ത്ര്യം, ഭരണഘടനാപരമായ അവകാശങ്ങൾ എന്നിവയുമായി ബന്ധപ്പെട്ട നിരവധി നിയമപ്രശ്നങ്ങളിൽ വിധി സ്വാധീനം ചെലുത്തിയേക്കുമെന്നാണ് വിലയിരുത്തൽ.
നീണ്ട നിയമപോരാട്ടങ്ങൾക്ക് വഴിവെച്ച ശബരിമല കേസിൽ ഒമ്പതംഗ ഭരണഘടനാ ബെഞ്ചിന്റെ വിധിക്കായി രാജ്യത്താകെ വലിയ ആകാംക്ഷയാണ് നിലനിൽക്കുന്നത്. സുപ്രീംകോടതിയുടെ പരാമർശത്തോടെ ഒക്ടോബർ ആദ്യവാരത്തിലേക്ക് വിധി സംബന്ധിച്ച പ്രതീക്ഷകൾ ശക്തമായിരിക്കുകയാണ്.
