പത്തനംതിട്ട: ശബരിമല നട അടച്ചിരിക്കുന്ന സമയത്തെ വീഡിയോ ചിത്രീകരിച്ച് യൂട്യൂബില്‍ പോസ്റ്റ് ചെയ്ത സംഭവത്തിൽ പമ്പ പൊലീസ് കേസെടുത്തു. ശബരിമലയില്‍ ഹൈക്കോടതി നിയോഗിച്ചിരിക്കുന്ന സ്‌പെഷ്യല്‍ കമ്മീഷണര്‍ ആര്‍ ജയകൃഷ്ണന്‍ പമ്പ പൊലീസിനോടും വനംവകുപ്പിനോടും റിപ്പോർട്ട് തേടിയിരുന്നു. ഇതിനെത്തുടർന്നാണ് പമ്പ പോലീസ് കേസെടുത്തത്. നട അടച്ചതിനുശേഷം ശബരിമലക്കാഴ്ച എന്ന തലക്കെട്ടോടെ 10 മിനിറ്റുള്ള വീഡിയോയാണ് പോസ്റ്റ് ചെയ്തിരിക്കുന്നത്. നട അടച്ചു കഴിഞ്ഞാല്‍ അധികൃതര്‍ക്കല്ലാതെ ആര്‍ക്കും പോകാന്‍ അനുവാദം ഇല്ലെന്നിരിക്കെ അതീവ സുരക്ഷാ മേഖലയിലേക്ക് ഇയാള്‍ കടന്നുവന്നതെങ്ങനെയെന്നതും അന്വേഷിക്കും.