കോഴിക്കോട്: കെപിസിസി പ്രസിഡന്റിനെ ഉചിതമായ സമയത്ത് ഹൈക്കമാൻഡ് തീരുമാനിക്കുമെന്ന് കോൺഗ്രസ് നേതാവും എംപിയുമായ ഷാഫി പറമ്പിൽ. കൃത്യമായ സമയത്ത് കൃത്യമായ തീരുമാനമുണ്ടാകുമെന്നും അദ്ദേഹം പറഞ്ഞു. നിലവിൽ അധ്യക്ഷ സ്ഥാനത്തേക്ക് ആരുടെയും പേര് ഉയർന്നുവന്നിട്ടില്ലെന്നും അദ്ദേഹം വ്യക്തമാക്കി.
കെപിസിസി അധ്യക്ഷ സ്ഥാനത്തെക്കുറിച്ചുള്ള പ്രചാരണം നടത്തേണ്ടത് മാധ്യമങ്ങളല്ലെന്നും ഹൈക്കമാൻഡ് തീരുമാനിക്കുന്നതിനപ്പുറം അഭിപ്രായം പറയാൻ താനാളല്ലെന്നും ഷാഫി പറമ്പിൽ പറഞ്ഞു. ഇക്കാര്യത്തിൽ തന്റെ വ്യക്തിപരമായ പ്രതീക്ഷയോ അനിഷ്ടമോ വ്യക്തമാക്കാനില്ലെന്നും അദ്ദേഹം കൂട്ടിച്ചേർത്തു. നിലവിലെ സാഹചര്യത്തിൽ കെപിസിസി അധ്യക്ഷ സ്ഥാനത്തെ നിയമനം സംബന്ധിച്ച് ഹൈക്കമാൻഡ് തീരുമാനമെടുക്കാനുണ്ടെന്ന് റിപ്പോർട്ടുകളുണ്ട്.
റിപ്പോർട്ടർ ടിവി എംഡി ആന്റോ അഗസ്റ്റിനെതിരായ എക്സൈസ് നടപടി സംബന്ധിച്ചും ഷാഫി പറമ്പിൽ പ്രതികരിച്ചു. എഫ്ഐആർ രജിസ്റ്റർ ചെയ്ത കേസിൽ പരിശോധന നടത്തിയതിൽ എന്താണ് പ്രശ്നമെന്ന് അദ്ദേഹം ചോദിച്ചു. മാധ്യമപ്രവർത്തനത്തിനെതിരെയല്ല നടപടി ഉണ്ടായതെന്നും, കേസുമായി ബന്ധപ്പെട്ട വ്യക്തിക്കെതിരെയാണ് നടപടിയെന്നും ഷാഫി പറമ്പിൽ അഭിപ്രായപ്പെട്ടു.
വൈദ്യുതി നിയന്ത്രണം കാരണം ജനങ്ങൾക്ക് ബുദ്ധിമുട്ടുണ്ടെന്നത് വസ്തുതയാണെന്നും അദ്ദേഹം പറഞ്ഞു. മറ്റ് സംസ്ഥാനങ്ങളിൽ നിന്ന് വൈദ്യുതി ലഭ്യമാക്കാൻ കെ. സി. വേണുഗോപാൽ ഇടപെടുന്നുണ്ടെന്നും പ്രശ്നത്തിന് പൂർണ പരിഹാരം കാണാൻ സമയമെടുക്കുമെന്നും ഷാഫി പറമ്പിൽ വ്യക്തമാക്കി. സിഎംആർഎൽ കേസിൽ നിയമം നിയമത്തിന്റെ വഴിക്ക് പോകുമെന്നും കേന്ദ്ര അന്വേഷണ ഏജൻസികളുടെ ആരാധകവൃന്ദമല്ല തങ്ങളെന്നും അദ്ദേഹം പറഞ്ഞു.
