തിരുവനന്തപുരം: വിജയത്തിന്റെ മധുരവും റാങ്കിന്റെ അഭിമാനവും ഒരിക്കൽ സ്വയം അനുഭവിച്ചറിഞ്ഞ ഒരാളാണ് ഇത്തവണ ലക്ഷക്കണക്കിന് വിദ്യാർത്ഥികളുടെ എസ്എസ്എൽസി ഫലം പ്രഖ്യാപിക്കാൻ വേദിയിലെത്തിയത്. 1986-ലെ എസ്എസ്എൽസി പരീക്ഷയിൽ മൂന്നാം റാങ്ക് നേടിയ ഷർമിള മേരി ജോസഫ് ഐഎഎസ് ആണ് ഇന്ന് സംസ്ഥാനത്തിന്റെ ഫലപ്രഖ്യാപനം നിർവഹിച്ചത്. ഇന്നത്തെ വിദ്യാർത്ഥികൾക്ക് അവർ നൽകുന്ന സന്ദേശം ലളിതമാണ് — “സ്വപ്നം കാണൂ, അത് സ്വന്തമാക്കൂ.”
1986-ൽ മൂന്നാം റാങ്ക് നേടിയ ഷർമിളയുടെ ചിത്രം അന്നത്തെ പത്രങ്ങളിൽ ഏറെ ശ്രദ്ധ നേടിയിരുന്നു. വർഷങ്ങൾക്കിപ്പുറം ഫലം പ്രഖ്യാപിക്കാനുള്ള ഉത്തരവാദിത്വം ഏറ്റെടുത്തപ്പോൾ, അന്നത്തെ വിജയത്തിന്റെ സന്തോഷവും കൗതുകവും ഇന്നും മനസിലുണ്ടെന്ന് അവർ പറഞ്ഞു. ഈ അവസരത്തെ വലിയൊരു നിയോഗമായാണ് കാണുന്നതെന്നും ഷർമിള മേരി ജോസഫ് ഏഷ്യാനെറ്റ് ന്യൂസിനോട് പ്രതികരിച്ചു. കഠിനാധ്വാനവും ആത്മവിശ്വാസവും ഉണ്ടെങ്കിൽ ഏത് ഉയരവും കീഴടക്കാമെന്നതിന്റെ ജീവനുള്ള ഉദാഹരണമായാണ് അവർ വിദ്യാർത്ഥികൾക്ക് മുന്നിൽ നിൽക്കുന്നത്.
എസ്എസ്എൽസി ഫലം 2026: പ്രധാന വിവരങ്ങൾ
ഈ വർഷം എസ്എസ്എൽസി പരീക്ഷയിൽ 99.07 ശതമാനമാണ് വിജയം. കഴിഞ്ഞ വർഷത്തെ അപേക്ഷിച്ച് വിജയശതമാനത്തിൽ നേരിയ കുറവുണ്ട്. പരീക്ഷ എഴുതിയവരിൽ 4,14,290 വിദ്യാർത്ഥികൾ ഉപരിപഠനത്തിന് യോഗ്യത നേടി.
എല്ലാ വിഷയങ്ങൾക്കും എ പ്ലസ് നേടിയവർ 30,514 പേരാണ്. കഴിഞ്ഞ വർഷം ഇത് 61,449 ആയിരുന്നു. വിജയശതമാനത്തിൽ ഇത്തവണയും പെൺകുട്ടികളാണ് മുന്നിൽ — 99.22 ശതമാനം. 20,771 പെൺകുട്ടികളും 9,743 ആൺകുട്ടികളും ഫുൾ എ പ്ലസ് നേട്ടം സ്വന്തമാക്കി.
വിദ്യാഭ്യാസ ജില്ലകളിൽ കുട്ടനാട് 100 ശതമാനം വിജയവുമായി ഒന്നാം സ്ഥാനത്തെത്തി. റവന്യൂ ജില്ലകളിൽ പത്തനംതിട്ടയാണ് മുന്നിൽ. കൊല്ലം ജില്ലയിലെ 11.6 ശതമാനം വിദ്യാർത്ഥികൾ എല്ലാ വിഷയങ്ങൾക്കും എ പ്ലസ് നേടി.
പുനർമൂല്യനിർണയത്തിന് മെയ് 16 മുതൽ 21 വരെ അപേക്ഷിക്കാം. സേ (SAY) പരീക്ഷ ജൂൺ ആദ്യവാരം നടക്കും. ഫലം ജൂൺ അവസാനത്തോടെ പ്രഖ്യാപിക്കും.
ഡിജി ലോക്കറിലൂടെയും വാട്സാപ്പ് സന്ദേശത്തിലൂടെയും ഫലം ലഭ്യമാകും.
വാട്സാപ്പ് നമ്പർ: +91 88619958
