ലീഡ്സ്: ഇംഗ്ലണ്ടിനെതിരായ ഒന്നാം ക്രിക്കറ്റ് ടെസ്റ്റില് സെഞ്ചുറി നേട്ടത്തോടെ ഇന്ത്യന് ക്യാപ്റ്റന് ശുഭ്മാന് ഗില് സ്വന്തമാക്കിയത് ഒരുപിടി റെക്കോഡുകള്. ഹെര്ബി ടെയ്ലര്, അലിസ്റ്റര് കുക്ക്, സ്റ്റീവന് സ്മിത്ത് എന്നിവര്ക്കു ശേഷം ക്യാപ്റ്റനായി ആദ്യ ടെസ്റ്റില് തന്നെ സെഞ്ചുറി നേടുന്ന നാലാമത്തെ പ്രായംകുറഞ്ഞ താരമായിരിക്കുകയാണ് ഗില്. 25ാം വയസ്സിലാണ് ഗില്ലിന്റെ നേട്ടം. ഒന്നാം ദിനം കളിയവസാനിക്കുമ്പോള് 175 പന്തില് നിന്ന് 127 റണ്സുമായി പുറത്താകാതെ നില്ക്കുകയാണ് ഗില്. താരത്തിന്റെ ആറാം ടെസ്റ്റ് സെഞ്ചുറി കൂടിയായിരുന്നു ഇത്. ഇന്ത്യയ്ക്ക് പുറത്തെ രണ്ടാമത്തേതും.
ഇതോടൊപ്പം ക്യാപ്റ്റനെന്ന നിലയില് അരങ്ങേറ്റ ഇന്നിങ്സില് തന്നെ സെഞ്ചുറി നേടുന്ന 23-ാമത്തെ താരമായി ഗില്. വിജയ് ഹസാരെ, സുനില് ഗാവസ്ക്കര്, വിരാട് കോലി എന്നിവര്ക്ക് ശേഷം ഈ നേട്ടം കൈവരിക്കുന്ന നാലാമത്തെ ഇന്ത്യന് താരവുമായിരിക്കുകയാണ്.
