കൃത്യം സമയം ആകുന്നത് നോക്കിയിരിക്കാതെ വാട്സാപ്പിൽ ആശംസകളും മറ്റും ഷെഡ്യൂൾ‌ ചെയ്യാൻ കഴിഞ്ഞിരുന്നെങ്കിൽ എന്ന് എപ്പോഴെങ്കിലും ആ​ഗ്രഹിച്ചിട്ടുണ്ടോ? എങ്കിലിതാ നിങ്ങളുടെ കാത്തിരിപ്പ് അവസാനിക്കുന്നു. ഷെഡ്യൂൾഡ് മെസ്സേജസ് എന്ന ഫീച്ചറാണ് വാട്‌സ്ആപ്പ് അവതരിപ്പിക്കാൻ ഒരുങ്ങുന്നത് എന്നാണ് പുറത്തുവരുന്ന വിവരം. യൂസേഴ്സ് മുൻകൂട്ടി തയ്യാറാക്കി ഷെഡ്യൂൾ ചെയ്യുന്ന സന്ദേശങ്ങൾ നിശ്ചിത തിയതിയിലും സമയത്തും വാട്സാപ്പ് സ്വയം അയക്കുന്ന സംവിധാനമാണിത്. അതായത് പ്രധാനപ്പെട്ട മെസേജുകളും ആശംസകളുമൊന്നും അയക്കാനായി ഇനി സമയം നോക്കിയിരിക്കുകയോ മറന്നുപോവുമെന്ന ആശങ്കയോ വേണ്ട. Apple-ന്റെ TestFlight ആപ്പിൽ ലഭ്യമായ ഏറ്റവും പുതിയ WhatsApp beta for iOS 26.7.10.72 അപ്‌ഡേറ്റിലാണ് ഇപ്പോൾ വന്നിരിക്കുന്നത്.

ഉപയോക്താവ് ഒരു സന്ദേശം ഷെഡ്യൂൾ ചെയ്ത് കഴിഞ്ഞാൽ അതിന്റെ തിയതിയും സമയവും ആകുന്നത് വരെ സ്ക്രീനിൽ കാണാം. ഏതൊക്കെ സന്ദേശങ്ങൾ, എത്രയെണ്ണം എന്നിവയെല്ലാം അവിടെയുണ്ടാകും. അവ എപ്പോൾ വേണമെങ്കിലും മാനേജ് ചെയ്യാനുള്ള ഓപ്ഷനുകളും ലഭ്യമായിരിക്കും. ഷെഡ്യൂൾ ചെയ്ത സന്ദേശങ്ങൾ അയയ്ക്കുന്നതിന് മുമ്പ് ഏത് സമയത്തും എഡിറ്റ് ചെയ്യാനും ഡിലീറ്റ് ചെയ്യാനും കഴിയും. ഈ ഫീച്ചർ എന്ന് വരും എന്ന കാര്യം വ്യക്തമല്ല.