തിരുവനന്തപുരം: ദുർബല വിഭാഗങ്ങൾക്കുള്ള ഓണക്കിറ്റിന് പുറമെ, പൊതുജനങ്ങൾക്കായി അത്തം ഓണസമ്മാനക്കിറ്റുമായി സപ്ലൈകോ. 21 ഇനങ്ങൾ ഉൾപ്പെടുന്ന കിറ്റിന് 1000 രൂപയാണ് വില. അരി, വെളിച്ചെണ്ണ, പഞ്ചസാര, ശബരി മസാലകൾ തുടങ്ങിയ സാധനങ്ങൾ കിറ്റിലുണ്ടാകും. സപ്ലൈകോയുടെ വിവിധ വിൽപ്പനശാലകളിൽ കിറ്റ് ലഭ്യമാക്കുമെന്ന് മന്ത്രി അനൂപ് ജേക്കബ് അറിയിച്ചു.

ഓണസദ്യയ്ക്ക് ആവശ്യമായ സാധനങ്ങളും ബ്രാൻഡഡ് ഉൽപ്പന്നങ്ങളും ഉൾപ്പെടുത്തി മറ്റ് പ്രത്യേക ഗിഫ്റ്റ് കിറ്റുകളും സപ്ലൈകോ പുറത്തിറക്കും. 25 ഇനങ്ങളുള്ള ഉത്രാടം കിറ്റിന് 1500 രൂപയും 30 ഇനങ്ങളുള്ള പ്രീമിയം തിരുവോണം കിറ്റിന് 2000 രൂപയുമാണ് വില.

പുട്ടുപൊടി, സേമിയ, പായസക്കൂട്ട്, മുളകുപൊടി, മഞ്ഞൾപ്പൊടി തുടങ്ങിയ ഒൻപത് പ്രീമിയം ശബരി ഉൽപ്പന്നങ്ങൾ ഉൾപ്പെടുത്തിയ ശബരി സിഗ്നേച്ചർ കിറ്റും വിൽപ്പനയ്ക്കെത്തും. 299 രൂപയാണ് ഈ കിറ്റിന്റെ വില.

ഇതിന് പുറമെ 500 രൂപയുടെയും 1000 രൂപയുടെയും മൂല്യമുള്ള സപ്ലൈകോ ഓണം ഗിഫ്റ്റ് കാർഡുകളും ലഭ്യമാകും. ഈ ഗിഫ്റ്റ് കാർഡുകൾ ഉപയോഗിച്ച് സപ്ലൈകോ ഔട്ട്‌ലെറ്റുകളിൽ നിന്ന് ആവശ്യമായ ഉൽപ്പന്നങ്ങൾ വാങ്ങാം. ഓണം സമ്മാനക്കൂപ്പണുകളും സപ്ലൈകോ ഒരുക്കിയിട്ടുണ്ട്.