തിരുവനന്തപുരം: സുഹൃത്തിനെ ആക്രമിച്ചത് ചോദ്യം ചെയ്തതിലുള്ള മുൻവൈരാഗ്യം കാരണം യുവാക്കളെ ബിയർ കുപ്പി കൊണ്ട് കുത്തിക്കൊല്ലാൻ ശ്രമിച്ച പ്രതികൾ പിടിയിൽ. പത്തനംതിട്ട ഏനാദിമംഗലം സ്വദേശി ജിതിൻ (27), തിരുവനന്തപുരം തുരുവിക്കൽ സ്വദേശി ശ്യാംകുമാർ (26), നെയ്യാറ്റിൻകര പെരുമ്പഴത്തൂർ സ്വദേശി ദീപു (27) എന്നിവരാണ് പിടിയിലായത്. ഞായറാഴ്ച പുലർച്ചെ പട്ടം കേന്ദ്രീയ വിദ്യാലയത്തിന് സമീപമുള്ള ഇടവഴിയിൽ വെച്ചായിരുന്നു സംഭവം.
സുഹൃത്തിനെ ആക്രമിച്ചതിൽ നേരത്തെ ഇവർ തമ്മിൽ തർക്കമുണ്ടായിരുന്നു. ഞായറാഴ്ച വഴിയിൽ വച്ചു കണ്ട ഇവർ യുവാക്കളെ അസഭ്യം പറയുകയും ബിയർ കുപ്പി കൊണ്ട് തലയ്ക്കടിക്കുകയും കുത്തി പരിക്കേൽപ്പിക്കുകയും ചെയ്തിരുന്നു. ആക്രമണത്തിന് ശേഷം ഒളിവിൽ പോയ പ്രതികളെ പൊലീസ് സംഘം പിടികൂടുകയായിരുന്നു. ചുള്ളിമാനൂർ സ്വദേശിയായ യുവാവിനും സുഹൃത്തുക്കൾക്കും നേരെയാണ് ആക്രമണമുണ്ടായത്.
