വയനാട്: ഹൈന്ദവാചാരപ്രകാരം നടന്ന വിവാഹത്തിൽ വധുവിന്റെ കൈപിടിച്ച് വരനെ ഏല്പിച്ചത് വൈദികൻ. വണ്ടൻപതാൽ ബെത്ലഹേം ആശ്രമത്തിലെ അന്തേവാസിയായ ശ്രീക്കുട്ടി (പാർവതി)യുടെ വിവാഹത്തിലാണ് ഈ വ്യത്യസ്തമായ സംഭവം.
ഒരു വയസ്സുള്ളപ്പോൾ ആശ്രമത്തിലെത്തിയ പാർവതിയെ ചെറുപ്പംമുതൽ ‘ശ്രീക്കുട്ടി’ എന്ന് വിളിച്ച് വളർത്തിയ ഫാ. റോയ് മാത്യുവാണ് വിവാഹത്തിൽ പിതാവിന്റെ ചുമതല ഏറ്റെടുത്ത് വധുവിന്റെ കൈപിടിച്ച് വരനായ അനന്തുവിന് കൈമാറിയത്. കട്ടപ്പന സ്വദേശിയായ അനന്തുവാണ് പാർവതിക്ക് താലിചാർത്തിയത്.
വണ്ടൻപതാൽ സെയ്ന്റ് പോൾസ് പള്ളി പാരീഷ് ഹാളിൽ നടന്ന ചടങ്ങിൽ ശാന്തിയും കാർമികനായി പങ്കെടുത്തു. സാധാരണയായി വധുവിന്റെ പിതാവാണ് ഈ ചുമതല നിർവഹിക്കുന്നത്. എന്നാൽ ആശ്രമത്തിൽ വളർന്ന പാർവതിക്ക് പിതൃസ്ഥാനം വഹിച്ചു ഫാ. റോയ് മാത്യു തന്നെയാണ് ഈ കടമ നിർവഹിച്ചത്.
തന്റെ പൗരോഹിത്യജീവിതത്തിലെ ഏറ്റവും സംതൃപ്തി നൽകിയ നിമിഷമാണിതെന്ന് അദ്ദേഹം പറഞ്ഞു. ഇടുക്കി പെരുവന്താനം സ്വദേശിയായ അദ്ദേഹം ഓർഫനേജ് കൺട്രോൾ ബോർഡ് അംഗവുമാണ്.
