ചെന്നൈ: തമിഴ്നാട്ടിലെ രണ്ട് നിയമസഭാ മണ്ഡലങ്ങളിലെ ഉപതെരഞ്ഞെടുപ്പ് പ്രചാരണം ചൂടുപിടിക്കുന്നതിനിടെ പ്രതിപക്ഷ നേതാവ് ഉദയനിധി സ്റ്റാലിന്റെ പ്രസംഗത്തിലെ പരാമർശം വിവാദമായി. ധാരാപുരത്തെ പ്രചാരണ യോഗത്തിൽ മുഖ്യമന്ത്രി വിജയ്ക്കെതിരെ നടത്തിയ ‘മൂഡ്’ പരാമർശമാണ് ചർച്ചയായത്.
മുഖ്യമന്ത്രിക്ക് കടൽക്കരയിൽ പുതിയ നിയമസഭാ മന്ദിരം വേണമെന്നും, സഭയിൽ ഇരിക്കുമ്പോൾ ബീച്ച് കാണണമെന്നും ഉദയനിധി പറഞ്ഞു. “ബീച്ച് കണ്ടാലേ അദ്ദേഹത്തിന് മൂഡ് വരൂ. ആ മൂഡല്ല, ജോലി ചെയ്യാനുള്ള മൂഡാണ്” എന്നായിരുന്നു തുടർന്നുള്ള പരാമർശം. പ്രസംഗത്തിനിടെ പ്രവർത്തകരിൽ നിന്ന് ചിരിയും കരഘോഷവും ഉയർന്നു.
പരാമർശത്തിനെതിരെ ടിവികെ രംഗത്തെത്തി. മുഖ്യമന്ത്രിക്കെതിരായ വ്യക്തിപരമായ പരാമർശങ്ങളും അശ്ലീലച്ചുവയുള്ള പരാമർശങ്ങളും ഒഴിവാക്കണമെന്ന് ടിവികെ നേതാക്കൾ ആവശ്യപ്പെട്ടു. ഉദയനിധിക്കെതിരെ രൂക്ഷ വിമർശനവും ടിവികെ നേതാക്കൾ ഉന്നയിച്ചു.
ഉപതെരഞ്ഞെടുപ്പ് പ്രചാരണത്തിൽ ഡിഎംകെയും അണ്ണാ ഡിഎംകെയും മുഖ്യമന്ത്രിയുടെ വ്യക്തിജീവിതവുമായി ബന്ധപ്പെട്ട വിഷയങ്ങൾ ഉന്നയിക്കുന്നുണ്ട്. മുഖ്യമന്ത്രി വിജയും നടി തൃഷയും ലണ്ടനിൽ ഒരുമിച്ച് യാത്ര ചെയ്തതുമായി ബന്ധപ്പെട്ട ആരോപണങ്ങളും അണ്ണാ ഡിഎംകെ നേതാവ് എടപ്പാടി പളനിസ്വാമി പ്രചാരണത്തിൽ ഉന്നയിച്ചിരുന്നു.
അതേസമയം, മധുരാന്തകത്ത് ഡിഎംകെ വിജയിച്ചാൽ മന്ത്രി പദവി രാജിവയ്ക്കുമെന്ന് ടിവികെ നേതാവ് ആധവ് അർജുന വെല്ലുവിളിച്ചു. മധുരാന്തകം, ധാരാപുരം മണ്ഡലങ്ങളിലാണ് ഒക്ടോബർ ആറിന് ഉപതെരഞ്ഞെടുപ്പ് നടക്കുന്നത്. അണ്ണാ ഡിഎംകെ ടിക്കറ്റിൽ വിജയിച്ച എംഎൽഎമാർ പിന്നീട് ടിവികെയിൽ ചേർന്നതിനെ തുടർന്നാണ് രണ്ട് മണ്ഡലങ്ങളിലും ഉപതെരഞ്ഞെടുപ്പ് വേണ്ടിവന്നത്.
