കോട്ടയം: 2026ലെ നിയമസഭാ തിരഞ്ഞെടുപ്പിൽ ചങ്ങനാശ്ശേരി നിയോജക മണ്ഡലത്തിൽ യുഡിഎഫ് സ്ഥാനാർഥിയായ വിനു ജോബ് വിജയം നേടി. 5,599 വോട്ടുകളുടെ ഭൂരിപക്ഷത്തിലാണ് അദ്ദേഹത്തിന്റെ ജയം. വിനു ജോബിന് 55,991 വോട്ടുകൾ ലഭിച്ചപ്പോൾ എൽഡിഎഫ് സ്ഥാനാർഥി ജോബ് മൈക്കിൾ 47,623 വോട്ടുകളും എൻഡിഎ സ്ഥാനാർഥി ബി. രാധാകൃഷ്ണ മേനോൻ 14,803 വോട്ടുകളും നേടി.

കേരള രാഷ്ട്രീയത്തിലെ പ്രമുഖനായിരുന്ന സി.എഫ്. തോമസ് തുടർച്ചയായി ഒമ്പത് തവണ പ്രതിനിധീകരിച്ച മണ്ഡലമായ ചങ്ങനാശ്ശേരി ഇത്തവണ കടുത്ത പോരാട്ടത്തിനാണ് സാക്ഷ്യം വഹിച്ചത്. കഴിഞ്ഞ അഞ്ച് വർഷത്തെ വികസന പ്രവർത്തനങ്ങളും വ്യക്തിപ്രഭാവവും മുൻനിർത്തിയാണ് എൽഡിഎഫ് സ്ഥാനാർഥി അഡ്വ. ജോബ് മൈക്കിൾ പ്രചാരണം നടത്തിയത്. അതേസമയം ക്രൈസ്തവ-നായർ വോട്ടുകളിൽ സ്വാധീനം ചെലുത്താൻ എൻഡിഎ ശ്രമിച്ചപ്പോൾ മണ്ഡലം തിരിച്ചുപിടിക്കുകയെന്ന ലക്ഷ്യത്തോടെയായിരുന്നു യുഡിഎഫ് രംഗത്തെത്തിയത്. അടിസ്ഥാന സൗകര്യ വികസനം, റബ്ബർ വില, കാർഷിക മേഖലയിലെ പ്രതിസന്ധി തുടങ്ങിയവ പ്രധാന തെരഞ്ഞെടുപ്പ് ചർച്ചാവിഷയങ്ങളായി.

2011ലും 2016ലും സി.എഫ്. തോമസ് വിജയിച്ചെങ്കിലും ശക്തമായ മത്സരമാണ് നേരിട്ടത്. 2016ൽ 50,371 വോട്ടുകൾ നേടി വിജയിച്ചപ്പോൾ എതിരാളിയായ കെ.സി. ജോസഫ് 48,522 വോട്ടുകളുമായി അടുത്ത് എത്തിയിരുന്നു. 2020ൽ സി.എഫ്. തോമസിന്റെ നിര്യാണത്തിന് പിന്നാലെ ഉണ്ടായ രാഷ്ട്രീയ മാറ്റങ്ങൾ മണ്ഡലത്തിന്റെ സ്വഭാവം മാറ്റി. കേരള കോൺഗ്രസ് (എം) ഇടതുമുന്നണിയിലേക്ക് ചേർന്നതോടെ 2021ൽ അഡ്വ. ജോബ് മൈക്കിൾ 55,425 വോട്ടുകൾ നേടി മണ്ഡലം എൽഡിഎഫിന് സ്വന്തമാക്കി. 49,366 വോട്ടുകൾ നേടിയ വി.ജെ. ലാലിയെ 6,059 വോട്ടുകളുടെ ഭൂരിപക്ഷത്തിലാണ് അന്ന് അദ്ദേഹം പരാജയപ്പെടുത്തിയത്.