പത്തനംതിട്ട: പത്തനംതിട്ട നാരങ്ങാനം ഗ്രാമപഞ്ചായത്തിൽ ബി.ജെ.പിക്ക് ഭരണം നഷ്ടമായി. യു.ഡി.എഫ് കൊണ്ടുവന്ന അവിശ്വാസ പ്രമേയം എൽ.ഡി.എഫിലെ രണ്ട് സി.പി.എം അംഗങ്ങളുടെ പിന്തുണയോടെ പാസായതോടെയാണ് ബി.ജെ.പി ഭരണസമിതി പുറത്തായത്.
14 അംഗങ്ങളുള്ള പഞ്ചായത്തിൽ ബി.ജെ.പിക്കും യു.ഡി.എഫിനും ആറ് വീതം അംഗങ്ങളാണുള്ളത്. എൽ.ഡി.എഫിന് രണ്ട് അംഗങ്ങളുമുണ്ട്. നിലവിലെ പ്രസിഡന്റ് സ്ഥാനത്തിരുന്ന ബി.ജെ.പി അംഗം വി.വി. പ്രസാദാണ് അവിശ്വാസ പ്രമേയത്തിലൂടെ പുറത്തായത്.
മുൻപ് നടന്ന പ്രസിഡന്റ് തിരഞ്ഞെടുപ്പിൽ ബി.ജെ.പിക്കും യു.ഡി.എഫിനും ആറ് വീതം വോട്ടുകൾ ലഭിച്ചതിനെ തുടർന്ന് നറുക്കെടുപ്പിലൂടെയാണ് ബി.ജെ.പിക്ക് പ്രസിഡന്റ് സ്ഥാനം ലഭിച്ചത്. അതേസമയം, വൈസ് പ്രസിഡന്റ് സ്ഥാനവും സമാന സാഹചര്യത്തിൽ നടന്ന നറുക്കെടുപ്പിലൂടെ കോൺഗ്രസിനായിരുന്നു ലഭിച്ചത്.
ഭരണസമിതിയുടെ സ്വജനപക്ഷപാതവും വികസനപ്രവർത്തനങ്ങളിലെ വീഴ്ചയുമാണ് അവിശ്വാസ പ്രമേയം കൊണ്ടുവരാൻ കാരണമായതെന്ന് യു.ഡി.എഫ് പ്രതിനിധികൾ ആരോപിച്ചു. പഞ്ചായത്തിന്റെ വികസനത്തിനായി പ്രസിഡന്റും വൈസ് പ്രസിഡന്റും ഒരേ മുന്നണിയിൽ നിന്നുള്ളവരാകുന്നത് ഗുണകരമാകുമെന്നും അവർ പറഞ്ഞു.
അവിശ്വാസ പ്രമേയം പാസായ സാഹചര്യത്തിൽ ഒരു മാസത്തിനകം പുതിയ പ്രസിഡന്റിനെ തിരഞ്ഞെടുക്കും. യു.ഡി.എഫ് സ്ഥാനാർഥിക്ക് എൽ.ഡി.എഫ് പിന്തുണ നൽകുമോയെന്നതാണ് ഇനി ശ്രദ്ധേയമാകുന്നത്. പിന്തുണ ലഭിക്കാത്ത പക്ഷം പ്രസിഡന്റ് തിരഞ്ഞെടുപ്പ് വീണ്ടും നറുക്കെടുപ്പിലേക്ക് നീങ്ങാൻ സാധ്യതയുണ്ട്.
