തിരുവനന്തപുരം: ഗതാഗത മന്ത്രി സി.പി. ജോൺ നടത്തിയ വിവാദ പരാമർശത്തെ മുൻമന്ത്രി വി. ശിവൻകുട്ടി വിമർശിച്ചു. സ്ത്രീകളെ അധിക്ഷേപിക്കുന്ന തരത്തിലുള്ള പ്രസ്താവനകൾ ഒരിക്കലും ഉണ്ടാകാൻ പാടില്ലെന്നും അദ്ദേഹം പറഞ്ഞു.
പൊതുപ്രവർത്തകരും ജനപ്രതിനിധികളും ജനങ്ങൾക്കൊപ്പമാണ് നിൽക്കേണ്ടതെന്നും, സർക്കാർ നൽകുന്ന ആനുകൂല്യങ്ങളുടെ പേരിൽ ജനങ്ങളെ ആക്ഷേപിക്കരുതെന്നും ശിവൻകുട്ടി പറഞ്ഞു. ഇത്തരം പരാമർശങ്ങൾ മാനസികമായി ആളുകളെ വേദനിപ്പിക്കുന്നതാണെന്നും അദ്ദേഹം കൂട്ടിച്ചേർത്തു.
പിഎം ശ്രീ പദ്ധതിയെക്കുറിച്ചും ശിവൻകുട്ടി പ്രതികരിച്ചു. പദ്ധതിയുടെ പേരിൽ യുഡിഎഫ് സർക്കാർ ജനങ്ങളെയും സ്വന്തം പ്രവർത്തകരെയും വഞ്ചിക്കുകയാണെന്ന് അദ്ദേഹം ആരോപിച്ചു. കേന്ദ്രസർക്കാരിന് മുന്നിൽ യുഡിഎഫ് വഴങ്ങിയെന്നും, വിഷയത്തിൽ കോൺഗ്രസിന്റെയും മുസ്ലിം ലീഗിന്റെയും നിലപാട് വ്യക്തമാക്കണമെന്നും അദ്ദേഹം ആവശ്യപ്പെട്ടു.
തിരുവനന്തപുരം കോർപ്പറേഷൻ കൗൺസിലർ സുഗതന്റെ അവധി അപേക്ഷയുമായി ബന്ധപ്പെട്ട നടപടികളെയും ശിവൻകുട്ടി വിമർശിച്ചു. ആഭ്യന്തര വകുപ്പിന്റെ സർക്കുലർ പിൻവലിക്കണമെന്നും, ബന്ധപ്പെട്ട ഉദ്യോഗസ്ഥർക്കെതിരെ കർശന നടപടി വേണമെന്നും അദ്ദേഹം ആവശ്യപ്പെട്ടു.
മുഖ്യമന്ത്രി വി.ഡി. സതീശനെയും ശിവൻകുട്ടി വിമർശിച്ചു. ദുരന്തസാഹചര്യത്തിൽ രക്ഷാപ്രവർത്തനങ്ങൾക്ക് മുൻഗണന നൽകേണ്ട സമയത്ത് മുഖ്യമന്ത്രി നടത്തിയ യാത്രകളും പൊതുപരിപാടികളും ജനങ്ങളിൽ സംശയം ഉണ്ടാക്കിയെന്നും അദ്ദേഹം ആരോപിച്ചു.
ദുരിതാശ്വാസ ക്യാമ്പുകളിലെ പ്രവർത്തനങ്ങൾ തൃപ്തികരമല്ലെന്നും, മുന്നറിയിപ്പ് ലഭിച്ചിട്ടും ആവശ്യമായ മുന്നൊരുക്കങ്ങൾ നടത്തിയില്ലെന്നും ശിവൻകുട്ടി പറഞ്ഞു. സംസ്ഥാനത്തെ ദുരന്തനിവാരണ പ്രവർത്തനങ്ങളിൽ സർക്കാർ കൂടുതൽ ശ്രദ്ധ ചെലുത്തണമെന്നും അദ്ദേഹം ആവശ്യപ്പെട്ടു.
