തിരുവനന്തപുരം: സംസ്ഥാനത്ത് ശനിയാഴ്ച വരെ ഉയര്ന്ന താപനില മുന്നറിയിപ്പ്. 12 ജില്ലകളില് കേന്ദ്ര കാലാവസ്ഥ വകുപ്പ് ജാഗ്രതാ നിര്ദേശം നല്കി. വിഷു ദിനമായ ഇന്നും കേരളം മൊത്തം വെന്തുരുകും. ഇന്ന് അടക്കം ഈ ദിവസങ്ങളില് പാലക്കാട് ജില്ലയില് ഉയര്ന്ന താപനില 40°C വരെയും കൊല്ലം ജില്ലയില് 38°C വരെയും ഉയരാം.
പത്തനംതിട്ട, ആലപ്പുഴ, കോട്ടയം, എറണാകുളം, തൃശൂര്, മലപ്പുറം, കോഴിക്കോട്, കണ്ണൂര്, കാസര്കോട് ജില്ലകളില് ഉയര്ന്ന താപനില 37°C വരെയും തിരുവനന്തപുരം ജില്ലയില് 36°C വരെയും രേഖപ്പെടുത്തുമെന്നാണ് പ്രവചനം.
സാധാരണയെക്കാള് 2 മുതല് 3°C വരെ കൂടുതല് ചൂട് അനുഭവപ്പെടും. ഉയര്ന്ന താപനിലയും ഈര്പ്പമുള്ള വായുവും കാരണം മലയോര മേഖലകളിലൊഴികെ ശനിയാഴ്ച വരെ ചൂടും അസ്വസ്ഥതയുമുള്ള കാലാവസ്ഥയ്ക്കും സാധ്യതയെന്നും കാലാവസ്ഥ വകുപ്പ് അറിയിച്ചു.
പരമാവധി പകല് സമയം വെയില് കൊള്ളാതിരിക്കാന് ശ്രമിക്കുക. ആവശ്യമില്ലെങ്കിലും ധാരാളം വെള്ളം കുടിക്കുക. പകല് സമയം മദ്യപാനം പൂര്ണമായും ഒഴിവാക്കുക.
