ആന്ധ്രാപ്രദേശ്: കഞ്ചാവ് വാങ്ങി നൽകണമെന്ന് ആവശ്യപ്പെട്ട് യുവാവ് മൊബൈൽ ടവറിന് മുകളിൽ കയറി ആത്മഹത്യാ ഭീഷണി മുഴക്കിയ സംഭവം ആന്ധ്രാപ്രദേശിലെ പ്രകാശം ജില്ലയിൽ ആശങ്കയുണ്ടാക്കി. മണിക്കൂറുകൾ നീണ്ട നാടകീയ സംഭവങ്ങൾക്കൊടുവിൽ പൊലീസും രക്ഷാപ്രവർത്തകരും ചേർന്നാണ് യുവാവിനെ സുരക്ഷിതമായി താഴെയിറക്കിയത്.
ഹനുമന്തു എന്ന യുവാവാണ് ടവറിന് മുകളിൽ കയറി ഒരു പാക്കറ്റ് കഞ്ചാവ് ആവശ്യപ്പെട്ട് നിലവിളിച്ചത്. അപകടകരമായ ഉയരത്തിൽ ഇരുന്ന് ഇയാൾ വിളിച്ചുപറയുന്നത് ശ്രദ്ധയിൽപ്പെട്ടതോടെ നാട്ടുകാർ സ്ഥലത്ത് തടിച്ചുകൂടി. താഴെയുണ്ടായിരുന്നവരോടും ഉദ്യോഗസ്ഥരോടും “ഒരു പാക്കറ്റ് കഞ്ചാവ് വാങ്ങിത്തരൂ” എന്ന് ഇയാൾ ആവർത്തിച്ച് ആവശ്യപ്പെട്ടതായാണ് റിപ്പോർട്ട്.
യുവാവ് താഴേക്ക് ചാടുമോ എന്ന ആശങ്കയിൽ നാട്ടുകാർ ഭീതിയിലായിരിക്കെ സംഭവത്തിന്റെ ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിച്ചു. വിവരം അറിഞ്ഞ് പൊലീസും ഫയർഫോഴ്സും സ്ഥലത്തെത്തി രക്ഷാപ്രവർത്തനം ആരംഭിച്ചു. മണിക്കൂറുകളോളം യുവാവുമായി സംസാരിച്ചും കൗൺസിലിങ് നൽകിയുമാണ് ഒടുവിൽ ഇയാളെ താഴെയിറക്കാൻ സാധിച്ചത്.
തുടർന്ന് ഹനുമന്തുവിനെ വൈദ്യപരിശോധനയ്ക്കും ചികിത്സയ്ക്കുമായി സമീപത്തെ സർക്കാർ ആശുപത്രിയിലേക്ക് മാറ്റി. കടുത്ത മാനസിക സമ്മർദ്ദമോ ലഹരി ഉപയോഗത്തിന്റെ സ്വാധീനമോ യുവാവിന്റെ പെരുമാറ്റത്തിന് പിന്നിലുണ്ടാകാമെന്നാണ് പൊലീസിന്റെ പ്രാഥമിക നിഗമനം.
