ഡിജിറ്റൽ ഇടപാടുകൾ പ്രോത്സാഹിപ്പിക്കുന്നതിനായി ഇന്ത്യൻ റെയിൽവേ പുതിയ പദ്ധതി പ്രഖ്യാപിച്ചു. റെയിൽ വൺ ആപ്പ് വഴി ബുക്ക് ചെയ്യുന്ന അൺറിസർവ്ഡ് ടിക്കറ്റുകൾക്ക് 3 ശതമാനം ഇളവ് നൽകും. 2026 ജൂലൈ 14 വരെ ഈ ആനുകൂല്യം ലഭ്യമാണ്.
യുപിഐ, ഡെബിറ്റ് കാർഡ്, ക്രെഡിറ്റ് കാർഡ്, നെറ്റ് ബാങ്കിംഗ് എന്നിവ പോലുള്ള ഡിജിറ്റൽ പേയ്മെന്റ് മാർഗങ്ങൾ ഉപയോഗിച്ച് ടിക്കറ്റ് ബുക്ക് ചെയ്താൽ മാത്രമേ ഇളവ് ലഭിക്കൂ. പണമായി ടിക്കറ്റ് വാങ്ങുന്നവർക്ക് ഈ ഇളവ് ലഭ്യമല്ലെന്ന് റെയിൽവേ അറിയിച്ചു.
ദിവസേന ജോലിക്കും പഠനത്തിനുമായി ട്രെയിനിൽ യാത്ര ചെയ്യുന്നവർക്ക് ഇത് വലിയ ആശ്വാസമാകും. 3 ശതമാനം ഇളവ് സ്ഥിരം യാത്രക്കാരുടെ ചെലവ് കുറയ്ക്കും. കൂടാതെ, സ്റ്റേഷനുകളിൽ നീണ്ട നിരയിൽ നിൽക്കേണ്ടതില്ലാതെ വീട്ടിൽ നിന്ന് തന്നെ ടിക്കറ്റ് ബുക്ക് ചെയ്യാൻ സാധിക്കുന്നതും വലിയ സൗകര്യമാണ്.
റെയിൽ വൺ ആപ്പ് വഴി റിസർവ്ഡ്, അൺറിസർവ്ഡ്, പ്ലാറ്റ്ഫോം ടിക്കറ്റുകൾ ബുക്ക് ചെയ്യാനും ലൈവ് ട്രെയിൻ വിവരങ്ങൾ അറിയാനും കഴിയും. പിഎൻആർ നില, പ്ലാറ്റ്ഫോം വിവരങ്ങൾ, യാത്രയ്ക്കിടെ ഭക്ഷണം ഓർഡർ ചെയ്യൽ തുടങ്ങിയ സേവനങ്ങളും ലഭ്യമാണ്.
ഐആർസിടിസി റെയിൽ കണക്ട്, എൻടിഇഎസ്, യുടിഎസ് ഓൺ മൊബൈൽ, റെയിൽ മദദ് എന്നീ സേവനങ്ങൾ ഒറ്റ ആപ്പിൽ ഉൾപ്പെടുത്തിയാണ് റെയിൽ വൺ പ്രവർത്തിക്കുന്നത്.
