മുംബൈ: മുംബൈയിലെ ലോക്കൽ ട്രെയിനിൽ നടന്ന ഒരു ആഘോഷത്തിന്റെ വീഡിയോയാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്. വനിതകൾക്കായി മാത്രം പ്രവർത്തിക്കുന്ന ‘ലേഡീസ് സ്പെഷ്യൽ’ ലോക്കൽ ട്രെയിൻ സർവീസിന്റെ 34-ാം വാർഷികമാണ് പശ്ചിമ റെയിൽവേയുടെ മുംബൈ ഡിവിഷൻ ആഘോഷിച്ചത്. ഇതിന്റെ ഭാഗമായി യാത്രക്കാർക്ക് റെയിൽവേ ഉദ്യോഗസ്ഥർ റോസാപ്പൂക്കൾ വിതരണം ചെയ്തു.
1992 മെയ് 5-നാണ് ലോകത്തിലെ ആദ്യ വനിതാ പ്രത്യേക ലോക്കൽ ട്രെയിൻ സർവീസ് പശ്ചിമ റെയിൽവേ ആരംഭിച്ചത്. മുംബൈ നഗരത്തിലെ തിരക്കേറിയ യാത്രാവ്യവസ്ഥയിൽ സ്ത്രീകൾക്ക് സുരക്ഷിതവും സൗകര്യപ്രദവുമായ യാത്ര ഉറപ്പാക്കുക എന്ന ലക്ഷ്യത്തോടെയായിരുന്നു ഈ സംവിധാനം ആരംഭിച്ചത്.
പതിറ്റാണ്ടുകളായി മുംബൈയിലെ ലക്ഷക്കണക്കിന് സ്ത്രീകളുടെ ദൈനംദിന ജീവിതത്തിന്റെ ഭാഗമായി ഈ ട്രെയിനുകൾ മാറിയിട്ടുണ്ട്. ഓഫീസിലേക്കും തിരിച്ചുമുള്ള യാത്രയിൽ സുരക്ഷയും ആശ്വാസവും നൽകുന്നതിൽ ഇവയുടെ പങ്ക് വലുതാണെന്ന് അധികൃതർ പറയുന്നു. സ്ത്രീ യാത്രക്കാരെ ശാക്തീകരിക്കുകയും സുരക്ഷിത യാത്ര ഉറപ്പാക്കുകയും ചെയ്യുന്നതിൽ റെയിൽവേയുടെ ദീർഘകാല പ്രതിബദ്ധതയുടെ പ്രതീകമാണിതെന്നും വെസ്റ്റേൺ റെയിൽവേ വ്യക്തമാക്കി.
ആഘോഷത്തിന്റെ ഭാഗമായി ട്രെയിനിനുള്ളിൽ ഉദ്യോഗസ്ഥരോടൊപ്പം യാത്രക്കാർ ഫോട്ടോയെടുക്കുകയും പൂക്കൾ സ്വീകരിച്ച് സന്തോഷം പങ്കിടുകയും ചെയ്യുന്ന ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുന്നു. മുംബൈയിലെ പൊതുഗതാഗത സംവിധാനത്തിൽ ലേഡീസ് സ്പെഷ്യൽ ട്രെയിനുകൾ വഹിക്കുന്ന പ്രാധാന്യം വീണ്ടും ചർച്ചയാക്കുന്ന സംഭവമായാണ് ഇത് മാറിയിരിക്കുന്നത്.
