ബംഗളൂരു: ടെമ്പോ ട്രാവലര് വിമാനത്തില് ഇടിച്ച് അപകടം. ബംഗളൂരു കെംപെഗൗഡ അന്താരാഷ്ട്ര വിമാനത്താവളത്തിലാണ് സംഭവം. ഇന്നലെ ഉച്ചയോടെയാണ് നിര്ത്തിയിട്ട ഇന്ഡിഗോ വിമാനത്തില് ടെമ്പോ ട്രാവലര് ഇടിച്ചത്.
ഡ്രൈവര് ഉറങ്ങിപ്പോയതാണ് അപകടത്തിന് കാരണമെന്നാണ് പ്രാഥമിക നിഗമനം. വിമാനത്താവളത്തിലെ എയര് സൈഡില് പാര്ക്കിംഗ് ബേ യില് ഇന്നലെ ഉച്ചയ്ക്ക് 12.15 ഓടെയാണ് അപകടം നടന്നത്.
സംഭവത്തില് ആളപായമോ ആര്ക്കെങ്കിലും പരിക്കേല്ക്കുകയോ ചെയ്തിട്ടില്ല. എല്ലാ പ്രോട്ടോക്കോളുകളും പാലിച്ചുകൊണ്ട് രക്ഷാപ്രവര്ത്തനം നടത്തിയതായും വിമാനത്താവള വക്താവ് അറിയിച്ചു. ഗ്ലോബ് ഗ്രൗണ്ട് ഇന്ത്യ കമ്പനിയുടെ ജീവനക്കാരനായ ഡ്രൈവറാണ് ടെമ്പോ ട്രാവലര് ഓടിച്ചിരുന്നത്. വാഹനം വിമാനത്തില് ഇടിച്ച ശേഷമാണ് ഡ്രൈവര് ഉറക്കം വിട്ടുണര്ന്നത്.
ആകാശ എയര് വിമാന കമ്പനിയുടെ ജീവനക്കാരെ ഓഫീസില് നിന്നും എയര്ക്രാഫ്റ്റ് ബേയിലേക്ക് എത്തിക്കുന്നതിനായാണ് ടെമ്പോ ട്രാവലര് ഉപയോഗിച്ചിരുന്നത്. അപകട സമയത്ത് വാഹനത്തിനുള്ളില് ഡ്രൈവര് മാത്രമാണ് ഉണ്ടായിരുന്നത്. സംഭവത്തില് ഡയറക്ടറേറ്റ് ജനറല് ഓഫ് സിവില് ഏവിയേഷന് അന്വേഷണം ആരംഭിച്ചിട്ടുണ്ട്. എന്ജിന് തകരാറിനെ തുടര്ന്ന് 2022 മുതല് പ്രവര്ത്തിക്കാതെ ബംഗളൂരു വിമാനത്താവളത്തില് പാര്ക്ക് ചെയ്തിരിക്കുന്ന ഇന്ഡിഗോ എ 320 വിമാനത്തിലാണ് വാഹനം ചെന്നിടിച്ചത്. സംഭവത്തില് അന്വേഷണം നടക്കുകയാണെന്നും ആവശ്യമായ നടപടികള് സ്വീകരിക്കും എന്നുമാണ് വിമാന കമ്പനിയുടെ പ്രതികരണം.
