ചെന്നൈ : തമിഴ്നാട്ടിലെ അടുത്ത നിയമസഭാ തെരഞ്ഞെടുപ്പിന് മുന്നോടിയായി തെക്കൻ ജില്ലകളെ ആവേശത്തിലാക്കി ടിവികെ അധ്യക്ഷൻ വിജയ് കന്യാകുമാരിയിൽ നടത്തിയ റോഡ് ഷോ ശ്രദ്ധേയമായി. തുറന്ന വാഹനത്തിൽ നിന്ന് ഇറങ്ങി പ്രവർത്തകരുടെയും ആരാധകരുടെയും ഇടയിലേക്ക് സൈക്കിൾ ചവിട്ടിയെത്തിയാണ് അദ്ദേഹം ജനങ്ങളെ അഭിസംബോധന ചെയ്തത്.

ഭരണകക്ഷിയായ ഡിഎംകെയെ ശക്തമായി വിമർശിച്ചുകൊണ്ട് നടത്തിയ പ്രസംഗത്തിൽ, സംസ്ഥാന ഭരണത്തിൽ വ്യാപകമായ അഴിമതിയും ജനപീഡനവും നിലനിൽക്കുന്നതായി വിജയ് ആരോപിച്ചു. സർക്കാർ ഓഫീസുകൾ സാധാരണക്കാർക്ക് ബുദ്ധിമുട്ട് സൃഷ്ടിക്കുന്ന കേന്ദ്രങ്ങളായി മാറിയിരിക്കുകയാണെന്നും, ചെറിയ കാര്യങ്ങൾക്ക് പോലും ജനങ്ങൾ ഉദ്യോഗസ്ഥരുടെയും രാഷ്ട്രീയ നേതാക്കളുടെയും മുന്നിൽ കൈനീട്ടേണ്ട അവസ്ഥയാണെന്നും അദ്ദേഹം പറഞ്ഞു. അഴിമതി താഴെത്തട്ടിൽ നിന്ന് മുകളിലേക്കു വരെ വ്യാപിച്ചിരിക്കുന്നുവെന്നും, ഓരോ സർക്കാർ പദ്ധതിയിൽ നിന്നും കമ്മീഷൻ രൂപത്തിൽ ‘കട്ട്’ മന്ത്രിമാരുടെ കൈകളിലേക്ക് പോകുന്നതായും അദ്ദേഹം ആരോപിച്ചു.

ജനങ്ങൾക്ക് സർക്കാർ സേവനങ്ങൾ ലഭിക്കാൻ ഓഫീസുകൾ കയറിയിറങ്ങേണ്ട സാഹചര്യം ഒഴിവാക്കുമെന്നതാണ് ടിവികെയുടെ പ്രധാന വാഗ്ദാനം. പദ്ധതികളും ആനുകൂല്യങ്ങളും നേരിട്ട് വീടുകളിലെത്തിക്കുന്ന സംവിധാനം നടപ്പാക്കുമെന്ന് വിജയ് ഉറപ്പുനൽകി. ഇതിന് ആധാർ മാതൃകയിൽ ഓരോ പൗരനും പ്രത്യേക തിരിച്ചറിയൽ കാർഡ് നൽകുകയും, അതിലൂടെ ഇടനിലക്കാരില്ലാതെ സേവനങ്ങൾ ലഭ്യമാക്കുമെന്നും അദ്ദേഹം വ്യക്തമാക്കി.

ഉച്ച കഴിഞ്ഞ് 3 മണി മുതൽ 8 മണി വരെ ആറ് നിയമസഭാ മണ്ഡലങ്ങളിലായി പര്യടനം നടത്താനായിരുന്നു വിജയ്‍ക്ക് അനുമതി നൽകിയിരുന്നത്. വിവേകാനന്ദ കോളേജിൽ നിശ്ചയിച്ചിരുന്ന പൊതുയോഗം ടിവികെ പിന്നീട് റദ്ദാക്കി. അതേസമയം, കടലൂരിൽ നടത്താനിരുന്ന റോഡ് ഷോയും മുമ്പ് റദ്ദാക്കിയിരുന്നു. പ്രചാരണത്തിനിടയിലെ ഈ ഇടവേളകൾക്കെതിരെ ഡിഎംകെ വിമർശനം ഉന്നയിച്ചിരുന്നുവെന്നും റിപ്പോർട്ടുകളുണ്ട്.