തിരുവനന്തപുരം: കുംഭമേളയിലെ വൈറൽ പെൺകുട്ടിയുടെ വിവാഹത്തിൽ പങ്കെടുത്തതിൽ തെറ്റില്ലെന്ന് എം.വി. ഗോവിന്ദൻ. വിവാഹം നടത്തുന്നതിന് മുമ്പ് എല്ലാ രേഖകളും പരിശോധിച്ചതാണെന്നും നിയമപരമായ തടസങ്ങളൊന്നുമില്ലായിരുന്നെന്നും അദ്ദേഹം പറഞ്ഞു.
വിവാഹിതർക്ക് പ്രായപൂർത്തിയായിട്ടില്ലെന്ന ആരോപണം അദ്ദേഹം തള്ളിക്കളഞ്ഞു. പെൺകുട്ടിയുടെ ആധാർ കാർഡും പാൻ കാർഡും ഉൾപ്പെടെയുള്ള രേഖകൾ പോലീസ് പരിശോധിച്ചതായും, എല്ലായിടത്തും ഒരേ ജനനത്തീയതിയാണ് രേഖപ്പെടുത്തിയിരിക്കുന്നതെന്നും ഗോവിന്ദൻ ചൂണ്ടിക്കാട്ടി. വിവാഹത്തിൽ പങ്കെടുത്തതിൽ എന്താണ് തെറ്റെന്ന് ചോദിച്ച അദ്ദേഹം, ഇത് “റിയൽ കേരള സ്റ്റോറി” ആണെന്നും പറഞ്ഞു. എല്ലാ കാര്യങ്ങളും പരിശോധിച്ച ശേഷമാണ് വിവാഹത്തിൽ പങ്കെടുത്തതെന്നും അദ്ദേഹം കൂട്ടിച്ചേർത്തു.
പോലീസ്, ക്ഷേത്ര കമ്മിറ്റി, തദ്ദേശ സ്വയംഭരണ സ്ഥാപനങ്ങൾ എന്നിവ എല്ലാം രേഖകൾ പരിശോധിച്ച ശേഷമാണ് വിവാഹം നടന്നതെന്നും അദ്ദേഹം വ്യക്തമാക്കി. കേസുകൾ വരുന്നത് സ്വാഭാവികമാണെന്നും അതിനെ ഭയപ്പെടുന്നില്ലെന്നും അദ്ദേഹം പ്രതികരിച്ചു. രണ്ട് വ്യത്യസ്ത മതവിഭാഗങ്ങളിൽപ്പെട്ട യുവതി-യുവാക്കൾ വിവാഹം കഴിക്കുന്നതിനെ ചിലർ ഭീഷണിയായി കാണുന്നുവെന്നും, ഈ വിവാദങ്ങൾക്ക് പിന്നിൽ സംഘപരിവാർ ശക്തികളാണെന്നും അദ്ദേഹം ആരോപിച്ചു.
അതേസമയം, നാഷണൽ കമ്മിഷൻ ഫോർ ഷെഡ്യൂൾഡ് ട്രൈബ്സ് നടത്തിയ അന്വേഷണത്തിൽ വിവാഹസമയത്ത് പെൺകുട്ടിക്ക് പ്രായപൂർത്തിയായിരുന്നില്ലെന്ന് കണ്ടെത്തിയിട്ടുണ്ട്. ഇതിന്റെ അടിസ്ഥാനത്തിൽ ഭർത്താവ് ഫർമാൻ ഖാനെതിരെ പോക്സോ കേസ് രജിസ്റ്റർ ചെയ്തിട്ടുണ്ട്. സംഭവം സംസ്ഥാനത്ത് വലിയ വിവാദങ്ങൾക്ക് ഇടയാക്കിയിരിക്കുകയാണ്.
