ചിറ്റൂർ: ആന്ധ്രാപ്രദേശിലെ ചിറ്റൂർ ജില്ലയിൽ പ്രഭാതസവാരിക്കിറങ്ങിയ മാധ്യമപ്രവർത്തകനെ അജ്ഞാതസംഘം കുത്തിക്കൊലപ്പെടുത്തി. എബിഎൻ ആന്ധ്രജ്യോതിയിലെ റിപ്പോർട്ടറായ ജഗൻമോഹൻ റെഡ്ഡിയാണ് കൊല്ലപ്പെട്ടത്. ബൈക്കിൽ പിന്തുടർന്നെത്തിയ അക്രമിസംഘം അദ്ദേഹത്തെ ആക്രമിച്ചു. ഓടിരക്ഷപ്പെടാൻ ശ്രമിച്ചെങ്കിലും പിന്നാലെ പിടികൂടി കുത്തിക്കൊലപ്പെടുത്തിയതായാണ് റിപ്പോർട്ടുകൾ. സംഭവസ്ഥലത്ത് വെച്ചുതന്നെ ജഗൻമോഹൻ റെഡ്ഡി മരിച്ചു.
കൊലപാതകത്തിന്റെ കാരണം വ്യക്തമല്ലെന്ന് പൊലീസ് അറിയിച്ചു. തൊഴിൽപരമായ വൈരാഗ്യമോ വ്യക്തിപരമായ പ്രശ്നങ്ങളോ കാരണമാണോയെന്ന് അന്വേഷിച്ചുവരികയാണ്. പ്രദേശത്തെ സിസിടിവി ദൃശ്യങ്ങൾ പരിശോധിച്ച് പ്രതികളെ കണ്ടെത്താനുള്ള ശ്രമം പുരോഗമിക്കുന്നു.
സംഭവത്തിൽ പ്രതിഷേധവുമായി മാധ്യമപ്രവർത്തകരുടെ സംഘടനകൾ രംഗത്തെത്തി. കുറ്റവാളികളെ വേഗത്തിൽ പിടികൂടണമെന്ന് അവർ ആവശ്യപ്പെട്ടു. അതേസമയം, സംഭവത്തെ തുടർന്ന് സംസ്ഥാനത്തെ നിയമ-സമാധാന നിലയെ വിമർശിച്ച് പ്രതിപക്ഷ പാർട്ടികളും രംഗത്തെത്തി. മൃതദേഹം ആശുപത്രിയിലേക്ക് മാറ്റിയിട്ടുണ്ട്. പോസ്റ്റ്മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുനൽകും.
