ഇന്ത്യയിലെ പ്രമുഖ സ്വകാര്യ ബഹിരാകാശ സ്ഥാപനമായ സ്കൈറൂട്ട് ഏറോസ്പേസ് പുതിയ നേട്ടത്തിലെത്തി. ഏറ്റവും പുതിയ നിക്ഷേപ സമാഹരണത്തോടെ കമ്പനിയുടെ മൂല്യം 110 കോടി ഡോളർ (ഏകദേശം 10,365 കോടി രൂപ) പിന്നിട്ടു. ഇതോടെ നൂറ് കോടി ഡോളറിലധികം മൂല്യമുള്ള കമ്പനികൾക്ക് ലഭിക്കുന്ന ‘യൂണിക്കോൺ’ പദവി സ്‌കൈറൂട്ട് സ്വന്തമാക്കി.

കമ്പനി പുതിയ ഘട്ടത്തിൽ 60 ദശലക്ഷം ഡോളർ (ഏകദേശം 565 കോടി രൂപ) സമാഹരിച്ചു. ഗൂഗിളിന്റെ മാതൃസ്ഥാപനമായ ആൽഫബെറ്റിന്റെ ഡയറക്ടർ ബോർഡ് അംഗം റാം ശ്രീറാമിന്റെ ഷെർപാലോ വെഞ്ചേഴ്സും സിംഗപ്പൂർ സർക്കാരിന്റെ നിക്ഷേപ സ്ഥാപനമായ ജിഐസിയും നിക്ഷേപത്തിന് നേതൃത്വം നൽകി. ലോകത്തിലെ പ്രമുഖ നിക്ഷേപ സ്ഥാപനമായ ബ്ലാക്ക്റോക്ക്, ഗ്രീൻകോ ഗ്രൂപ്പ് സ്ഥാപകർ, അർക്കം വെഞ്ചേഴ്സ്, പ്ലേബുക്ക് പാർട്ണേഴ്സ് എന്നിവരും നിക്ഷേപകരായി രംഗത്തെത്തി.

ഇന്ത്യയിലെ ആദ്യ സ്വകാര്യ ഭ്രമണപഥ റോക്കറ്റായ വിക്രം-1 വിക്ഷേപണത്തിനൊരുങ്ങുന്നതിനിടെയാണ് സ്‌കൈറൂട്ടിന് ഈ വലിയ നിക്ഷേപം ലഭിച്ചത്. അടുത്ത ഏതാനും ആഴ്ചകൾക്കകം വിക്രം-1 വിക്ഷേപിക്കാനാണ് പദ്ധതി. 350 കിലോഗ്രാം വരെ ഭാരമുള്ള ചെറിയ ഉപഗ്രഹങ്ങളെ ഭ്രമണപഥത്തിലെത്തിക്കാൻ ശേഷിയുള്ള റോക്കറ്റാണിത്. ത്രിമാന അച്ചടി സാങ്കേതികവിദ്യയിൽ നിർമ്മിച്ച എൻജിനുകളും അത്യാധുനിക കാർബൺ ഘടനയുമാണ് വിക്രം-1ന്റെ പ്രധാന സവിശേഷതകൾ.

പുതിയ നിക്ഷേപം ഉപയോഗിച്ച് വിക്രം-1ന്റെ വിക്ഷേപണങ്ങൾ വർധിപ്പിക്കാനും കൂടുതൽ കരുത്തുള്ള വിക്രം-2 റോക്കറ്റ് വികസിപ്പിക്കാനുമാണ് കമ്പനിയുടെ ലക്ഷ്യം. ഏകദേശം ഒരു ടൺ ഭാരം വഹിക്കാൻ ശേഷിയുള്ള വിക്രം-2 ഭാവിയിൽ ആഗോള ബഹിരാകാശ രംഗത്ത് സ്‌കൈറൂട്ടിന്റെ സാന്നിധ്യം കൂടുതൽ ശക്തമാക്കുമെന്നാണ് പ്രതീക്ഷ.

2022ൽ വിക്രം-എസ് റോക്കറ്റ് വിജയകരമായി വിക്ഷേപിച്ച് ബഹിരാകാശത്ത് എത്തുന്ന ആദ്യ ഇന്ത്യൻ സ്വകാര്യ കമ്പനിയായി സ്‌കൈറൂട്ട് ചരിത്രം കുറിച്ചിരുന്നു. പവൻ കുമാർ ചന്ദനയും നാഗ ഭരത് ദാക്കയും ചേർന്നാണ് കമ്പനി സ്ഥാപിച്ചത്. ഇതുവരെ ഏകദേശം 100 ദശലക്ഷം ഡോളറിന്റെ നിക്ഷേപമാണ് കമ്പനി സമാഹരിച്ചിട്ടുള്ളത്. വിമാനയാത്ര പോലെ ബഹിരാകാശ സേവനങ്ങളും സാധാരണക്കാർക്ക് കൂടുതൽ ലഭ്യമാക്കുക എന്ന ലക്ഷ്യത്തോടെയാണ് സ്‌കൈറൂട്ട് മുന്നേറുന്നത്.