തിരുവനന്തപുരം: സാങ്കേതിക പരീക്ഷാ കൺട്രോളർ നടത്തിയ കെ.ജി.സി.ഇ എൻജിനിയറിങ് ഒന്നാം വർഷ പരീക്ഷകളിൽ ക്രമക്കേട് കണ്ടെത്തിയതിനെ തുടർന്ന് മൂന്ന് പരീക്ഷകൾ റദ്ദാക്കി. ജൂൺ 23, 29, ജൂലൈ 1 തീയതികളിൽ നടന്ന പരീക്ഷകളാണ് റദ്ദാക്കിയത്.

ടെക്നിക്കൽ എക്സാമിനേഷൻസ് ജോയിന്റ് കൺട്രോളറാണ് പരീക്ഷ റദ്ദാക്കിയതായി ഔദ്യോഗിക അറിയിപ്പ് പുറത്തിറക്കിയത്.

കെ.ജി.സി.ഇ എൻജിനിയറിങ് (റിവിഷൻ 2022) ഏപ്രിൽ 2026 പരീക്ഷയിലെ ‘1001-ബേസിക് മാത്തമാറ്റിക്സ് ആൻഡ് സയൻസ്’, ‘1002-എൻജിനിയറിങ് ഡ്രോയിങ്’, ‘1031-ഇലക്ട്രിക്കൽ ആൻഡ് ഇലക്ട്രോണിക്സ് – I’ എന്നീ വിഷയങ്ങളിലെ പരീക്ഷകളാണ് റദ്ദാക്കിയത്.

ഈ പരീക്ഷകളുമായി ബന്ധപ്പെട്ട് ക്രമക്കേട് നടന്നതായി റിപ്പോർട്ട് ലഭിച്ചതിന്റെ അടിസ്ഥാനത്തിലാണ് നടപടി സ്വീകരിച്ചതെന്ന് അധികൃതർ അറിയിച്ചു. റദ്ദാക്കിയ പരീക്ഷകളുടെ പുതുക്കിയ തീയതികൾ ഉടൻ പ്രസിദ്ധീകരിക്കുമെന്നും സാങ്കേതിക പരീക്ഷാ വിഭാഗം വ്യക്തമാക്കി.