കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിലെ നാലാം ടെർമിനലിൽ വൻ മയക്കുമരുന്ന് വേട്ട. ലണ്ടനിൽ നിന്ന് എത്തിയ യാത്രക്കാരനിൽ നിന്ന് 9.6 കിലോഗ്രാം മെത്ത് മയക്കുമരുന്ന് കസ്റ്റംസ് ഉദ്യോഗസ്ഥർ പിടികൂടി.
യാത്രക്കാരന്റെ ലഗേജ് വിശദമായി പരിശോധിച്ചപ്പോഴാണ് മയക്കുമരുന്ന് കണ്ടെത്തിയത്. രാസവസ്തുക്കളിൽ മുക്കിയെടുത്ത എ4 വലുപ്പത്തിലുള്ള 1,197 പേപ്പർ ഷീറ്റുകളിലായാണ് മയക്കുമരുന്ന് ഒളിപ്പിച്ചിരുന്നത്. ആകെ 9.6 കിലോഗ്രാം ഭാരമാണ് ഇവയ്ക്കുണ്ടായിരുന്നത്.
പിടിച്ചെടുത്ത മയക്കുമരുന്നും യാത്രക്കാരനെയും തുടർ നിയമനടപടികൾക്കായി ജനറൽ ഡിപ്പാർട്ട്മെന്റ് ഫോർ നർക്കോട്ടിക്സ് കൺട്രോൾ ആൻഡ് ആൽക്കഹോൾ കൺട്രോളിന് കൈമാറി. സംഭവത്തിൽ കസ്റ്റംസ് അധികൃതർ ഔദ്യോഗിക സീസർ റിപ്പോർട്ടും തയ്യാറാക്കി.
