തിരുവനന്തപുരം: രോഗാവസ്ഥയുടെ അവസാനഘട്ടത്തിൽ മാത്രമല്ല, ദീർഘകാല രോഗങ്ങൾ കണ്ടെത്തുന്ന ഘട്ടം മുതൽ പാലിയേറ്റീവ് പരിചരണം ഉറപ്പാക്കുകയാണ് ലക്ഷ്യമെന്ന് ആരോഗ്യമന്ത്രി കെ. മുരളീധരൻ. പാലിയേറ്റീവ് പരിചരണം ആവശ്യമുള്ള സംസ്ഥാനത്തെ മുഴുവൻ രോഗികളെയും കണ്ടെത്തുന്നതിനുള്ള നടപടികൾ സ്വീകരിക്കുമെന്നും മന്ത്രി വ്യക്തമാക്കി.

സത്യൻ സ്മാരക ഹാളിൽ ലോക പാലിയേറ്റീവ് ദിനാചരണത്തിന്റെ സംസ്ഥാനതല ഉദ്ഘാടനത്തോടനുബന്ധിച്ച് സംഘടിപ്പിച്ച രോഗീസംഗമം ഉദ്ഘാടനം ചെയ്യുകയായിരുന്നു അദ്ദേഹം.

ഹൃദയരാഗം പദ്ധതി മൂന്ന് മണ്ഡലങ്ങളിൽ

ആരോഗ്യപ്രവർത്തകർ വീടുകളിലെത്തി രോഗനിർണയ പരിശോധനകൾ നടത്തുന്ന ഹൃദയരാഗം പദ്ധതി ഇടുക്കി, നിലമ്പൂർ, വട്ടിയൂർക്കാവ് നിയോജക മണ്ഡലങ്ങളിൽ പരീക്ഷണാടിസ്ഥാനത്തിൽ നടപ്പാക്കുകയാണ്. പദ്ധതി വിജയകരമായാൽ സംസ്ഥാനത്തെ 140 നിയോജക മണ്ഡലങ്ങളിലേക്കും വ്യാപിപ്പിക്കും. പാലിയേറ്റീവ് പരിചരണ സംവിധാനത്തെയും പദ്ധതിയുമായി ബന്ധിപ്പിക്കുമെന്നും മന്ത്രി പറഞ്ഞു.

പാലിയേറ്റീവ് പരിചരണം അവകാശാധിഷ്ഠിത പ്രവർത്തനം

പാലിയേറ്റീവ് പരിചരണ രംഗത്ത് കേരളം രാജ്യത്തിന് മാതൃകയാണെന്ന് മന്ത്രി ചൂണ്ടിക്കാട്ടി. രോഗികളുടെ ശാരീരിക വിഷമതകൾ കുറയ്ക്കുന്നതിനൊപ്പം മാനസികവും സാമൂഹികവുമായ പിന്തുണ ഉറപ്പാക്കാനും സംസ്ഥാനത്തിന് സാധിക്കുന്നുണ്ട്. പാലിയേറ്റീവ് പരിചരണം കേവലം കാരുണ്യപ്രവർത്തനമല്ലെന്നും അത് അവകാശാധിഷ്ഠിതവും ജനകീയവുമായ പ്രവർത്തനമാണെന്നും അദ്ദേഹം പറഞ്ഞു.

പ്രാഥമിക ആരോഗ്യസംവിധാനവും പാലിയേറ്റീവ് പരിചരണവും തമ്മിലുള്ള ബന്ധം കൂടുതൽ ശക്തിപ്പെടുത്തേണ്ടതുണ്ട്. യുവാക്കൾ കൂടുതലായി ഈ മേഖലയിലേക്ക് കടന്നുവരുന്നത് പ്രതീക്ഷ നൽകുന്ന കാര്യമാണ്. എസ്എസ്എൽസി പാസായവർക്ക് ആരോഗ്യസർവകലാശാലയുടെ നേതൃത്വത്തിൽ പാലിയേറ്റീവ് പരിചരണത്തിൽ സർട്ടിഫിക്കറ്റ് കോഴ്‌സും ഒരുക്കിയിട്ടുണ്ടെന്ന് മന്ത്രി അറിയിച്ചു.

ചടങ്ങിൽ വാർഡ് കൗൺസിലർ ഷേർളി എസ് അധ്യക്ഷത വഹിച്ചു. രോഗികളും പാലിയേറ്റീവ് പ്രവർത്തകരും പങ്കെടുത്ത പരിപാടിയിൽ ആരോഗ്യവകുപ്പ് അഡീഷണൽ ഡയറക്ടർ ഡോ. റീത്തയും സന്നിഹിതയായിരുന്നു.