കാസർകോട്: ചികിത്സയ്ക്കായി ജില്ലാ വെറ്ററിനറി കേന്ദ്രത്തിലെത്തിച്ച വളർത്തുനായയ്ക്ക് പേവിഷബാധ സ്ഥിരീകരിച്ചതിനെ തുടർന്ന് മയക്കുവെടിവെച്ച് കൊന്നു. സീതാംഗോളി സ്വദേശിയുടെ പോമറേനിയൻ ഇനത്തിൽപ്പെട്ട നായയെയാണ് കൊന്നത്. നായയ്ക്ക് പേവിഷബാധയുണ്ടെന്ന് അറിയാതെയാണ് ഉടമ ചികിത്സയ്ക്കായി ജില്ലാ വെറ്ററിനറി കേന്ദ്രത്തിൽ എത്തിച്ചത്. ഇതിനിടെ നായ ഉടമയെ കടിക്കുകയും ചെയ്തു.
നായയെ പരിശോധിച്ച സീനിയർ വെറ്ററിനറി സർജൻ ഡോ. എസ്. രാജു പേവിഷബാധ സ്ഥിരീകരിച്ചു. തുടർന്ന് ചികിത്സിച്ച് രക്ഷപ്പെടുത്താൻ കഴിയാത്ത സാഹചര്യമുണ്ടായതിനാൽ ഡാർട്ട് ഗൺ ഉപയോഗിച്ച് മയക്കുവെടിവെച്ച് നായയെ കൊല്ലുകയായിരുന്നു.
