ന്യൂഡൽഹി: ചെക്ക്–ഇൻ സംവിധാനത്തിൽ ഉണ്ടായ സാങ്കേതിക തകരാർ പരിഹരിച്ചുവെന്നും വിമാന ഗതാഗതം പൂർവ്വസ്ഥിതിയിലേക്ക് മടങ്ങിയതായും എയർ ഇന്ത്യ അറിയിച്ചു. അമേഡിയസ് എന്ന ത്രീഡ് പാർട്ടി സോഫ്റ്റ്വെയറിൽ ഉണ്ടായ പ്രശ്നമാണ് എയർലൈൻസുകളുടെ ബുക്കിംഗ്, റിസർവേഷൻ നടപടികൾ തടസ്സപ്പെടുത്തിയത്.
തകരാറിനെ തുടർന്ന് ഇൻഡിഗോ ഉൾപ്പെടെയുള്ള നിരവധി വിമാനങ്ങൾ വൈകിയപ്പോൾ, മൂന്ന് മണിക്കൂറിലേറെ ചെക്ക്–ഇൻ സേവനങ്ങൾ തകരാറിലായിരുന്നു. സോഫ്റ്റ്വെയർ പൂർണ്ണമായി പുനഃസ്ഥാപിച്ചതിനാൽ രാജ്യത്തെ എല്ലാ വിമാനത്താവളങ്ങളിലും ചെക്ക്–ഇൻ സാധാരണ രീതിയിൽ പ്രവർത്തിക്കുന്നുവെന്നും മുൻനിശ്ചയിച്ച പ്രകാരം സർവീസുകൾ നടത്തിവരുന്നതായും എയർ ഇന്ത്യ എക്സിൽ പോസ്റ്റ് ചെയ്തു.
