ഫുട്‌ബോളിലെ ഏറ്റവും പ്രശസ്തമായ വ്യക്തിഗത പുരസ്‌കാരങ്ങളിലൊന്നായ ബാലൺ ഡി ഓർ പ്രഖ്യാപനത്തിന് തൊട്ടുമുമ്പ് സംഘാടകർക്ക് നാണക്കേടായി വെബ്‌സൈറ്റിലെ പിഴവ്. ഹാരി കെയിൻ, കിലിയൻ എംബാപ്പെ, ലാമിൻ യമാൽ എന്നിവർ പുരസ്‌കാരം നേടിയതായി അവകാശപ്പെടുന്ന മൂന്ന് വ്യത്യസ്ത ലേഖനങ്ങളാണ് ബാലൺ ഡി ഓറിന്റെ ഔദ്യോഗിക വെബ്‌സൈറ്റിൽ അബദ്ധത്തിൽ പ്രസിദ്ധീകരിച്ചത്. പ്രഖ്യാപനച്ചടങ്ങ് ആരംഭിക്കാൻ രണ്ടര മണിക്കൂർ മാത്രം ശേഷിക്കെയായിരുന്നു സംഭവം.
ലണ്ടനിലെ പലാഡിയത്തിൽ പുരസ്‌കാരച്ചടങ്ങ് തുടങ്ങുന്നതിന് മുമ്പുണ്ടായ ഈ വീഴ്ച ഫുട്‌ബോൾ ലോകത്ത് ചർച്ചയായി. ലേഖനങ്ങൾ ഉടൻ വെബ്‌സൈറ്റിൽനിന്ന് നീക്കം ചെയ്തെങ്കിലും സ്ക്രീൻഷോട്ടുകൾ സമൂഹമാധ്യമങ്ങളിൽ വ്യാപകമായി പ്രചരിച്ചു.
മൂന്ന് ലേഖനങ്ങളിലും വ്യത്യസ്ത താരങ്ങളെയാണ് ജേതാക്കളായി അവതരിപ്പിച്ചത്. ഹാരി കെയിന്റെ ഗോൾനേട്ടങ്ങളെ പ്രശംസിച്ചുകൊണ്ടായിരുന്നു ഒരു ലേഖനം. ബാഴ്‌സലോണയുടെ കൗമാരതാരം ലാമിൻ യമാൽ ബാലൺ ഡി ഓർ നേടുന്ന ചരിത്രത്തിലെ ഏറ്റവും പ്രായം കുറഞ്ഞ താരമായെന്നായിരുന്നു രണ്ടാമത്തെ ലേഖനത്തിലെ അവകാശവാദം. റയൽ മാഡ്രിഡിനായി നടത്തിയ മികച്ച പ്രകടനത്തിന്റെ അടിസ്ഥാനത്തിൽ കിലിയൻ എംബാപ്പെ ആദ്യമായി പുരസ്‌കാരം നേടിയെന്നായിരുന്നു മൂന്നാമത്തെ ലേഖനം.
പുരസ്കാര പ്രഖ്യാപനത്തിന് മുന്നോടിയായി തയ്യാറാക്കിയ ലേഖനങ്ങൾ അബദ്ധത്തിൽ പ്രസിദ്ധീകരിച്ചതാണോ, അതോ ജേതാവിനെക്കുറിച്ചുള്ള വിവരങ്ങൾ ചോർന്നതാണോ എന്ന കാര്യത്തിൽ വ്യക്തതയില്ല. സംഭവത്തിൽ സംഘാടകരുടെ ഭാഗത്തുനിന്നുണ്ടായ വീഴ്ചയെ വിമർശിച്ച് നിരവധി ഫുട്‌ബോൾ ആരാധകർ രംഗത്തെത്തി.
സെപ്റ്റംബർ 28-ന് തന്നെ വോട്ടെടുപ്പ് പൂർത്തിയായതിനാൽ പ്രഖ്യാപനത്തിനുള്ള മുന്നൊരുക്കങ്ങൾക്ക് സംഘാടകർക്ക് മതിയായ സമയം ലഭിച്ചിരുന്നു. എന്നിട്ടും ഔദ്യോഗിക വെബ്‌സൈറ്റിൽ ഇത്തരമൊരു പിഴവ് സംഭവിച്ചത് ചർച്ചകൾക്ക് വഴിവെച്ചു.
അന്താരാഷ്ട്ര കായിക മാധ്യമപ്രവർത്തകരുടെ ജൂറിയാണ് താരങ്ങളുടെ വ്യക്തിഗത പ്രകടനം, ഗോളുകൾ, ടീമിന്റെ നേട്ടങ്ങൾ തുടങ്ങിയ ഘടകങ്ങൾ വിലയിരുത്തി ബാലൺ ഡി ഓർ ജേതാവിനെ തിരഞ്ഞെടുക്കുന്നത്.
എന്നാൽ, ഔദ്യോഗിക പ്രഖ്യാപനത്തിന് മുമ്പ് മൂന്ന് വ്യത്യസ്ത താരങ്ങളെ വിജയികളായി അവതരിപ്പിച്ച ലേഖനങ്ങൾ പുറത്തുവന്നത് പുരസ്‌കാരത്തിന്റെ വിശ്വാസ്യതയെയും സംഘാടനത്തിലെ കൃത്യതയെയും സംബന്ധിച്ച് ചോദ്യങ്ങൾ ഉയർത്തി. വെബ്‌സൈറ്റിലെ പിഴവിന് പിന്നിലെ യഥാർഥ കാരണം എന്താണെന്നതിൽ ഔദ്യോഗിക വിശദീകരണം നിർണായകമാകും.
