തിരുവനന്തപുരം: ഇന്ത്യയുടെ ലോകകപ്പ് ഹീറോ സഞ്ജു സാംസണ്‍ ജന്മനാട്ടില്‍ തിരിച്ചെത്തി. ഇന്ന് വൈകിട്ട് ആറ് മണിയോടെയാണ് സഞ്ജു തിരുവനന്തപുരത്ത് വിമാനമിറങ്ങിയത്. പ്രിയ താരത്തെ സ്വീകരിക്കാന്‍ ആയിരങ്ങള്‍ വിമാനത്താവളത്തില്‍ തടിച്ചുകൂടിയിരുന്നു. മന്ത്രി വി ശിവന്‍കുട്ടി, എംപി എ എ റഹീം എന്നിവരും സഞ്ജുവിനെ സ്വീകരിക്കാന്‍ എത്തിയിരുന്നു. വരും ദിവസങ്ങളില്‍ വലിയ സ്വീകരണങ്ങള്‍ സഞ്ജുവിനെ കാത്തിരിക്കുന്നുണ്ട്. സംസ്ഥാന സര്‍ക്കാര്‍ ഔദ്യോഗിക സ്വീകരണം നല്‍കും. തിരുവനന്തപുരത്തായിരിക്കും സ്വീകരണം നല്‍കുകയെന്ന് ശിവന്‍കുട്ടി അറിയിച്ചു. നിങ്ങളുടെയെല്ലാം പ്രാര്‍ത്ഥന കൊണ്ടാണ് ഇത് സാധ്യമായതെന്ന് സഞ്ജു പ്രതികരിച്ചു.

തിരുവനന്തപുരം: ഇന്ത്യക്ക് മൂന്നാം ടി20 കിരീടം നേടുന്നതില്‍ നിര്‍ണായക പങ്കുവഹിക്കുകയും ടൂര്‍ണമെന്റിലെ താരമായി മലയാളികളുടെ അഭിമാനമായി മാറിയ സഞ്ജു സാംസണെ ആദരിക്കാന്‍ സംസ്ഥാന സര്‍ക്കാര്‍. സഞ്ജുവിന് സര്‍ക്കാര്‍ ഔദ്യോഗിക സ്വീകരണം ഒരുക്കും. സഞ്ജുവിന്റെ വലിയ ആത്മാര്‍ത്ഥതയും പരിശ്രമവും കൊണ്ടാണ് ലോകത്തോളം വളര്‍ന്നത്. ആ നേട്ടത്തില്‍ സഞ്ജുവിനെ സംസ്ഥാന സര്‍ക്കാര്‍ അഭിനന്ദിക്കുന്നുതായി മന്ത്രി വി ശിവന്‍കുട്ടി പറഞ്ഞു. ദിവസവും സമയവും സ്ഥലവും സഞ്ജുവിന്റെ കൂടി സൗകര്യം പരിഗണിച്ചായിരിക്കും തീരുമാനിക്കുക.