മലപ്പുറം: മുനമ്പം വഖഫ് ഭൂമി സംബന്ധിച്ച പ്രശ്നത്തിൽ സമഗ്ര അന്വേഷണം നടത്തി പരിഹാരം കാണണമെന്ന് അഖില കേരള വഖഫ് സംരക്ഷണസമിതി ആവശ്യപ്പെട്ടു. പരമോന്നത കോടതി വരെ മുനമ്പം വഖഫ് സ്വത്താണെന്നും അത് സംരക്ഷിക്കപ്പെടേണ്ടതാണെന്നും വ്യക്തമാക്കിയ സാഹചര്യത്തിൽ, ഭൂമി കൈയേറ്റത്തെ ന്യായീകരിക്കുന്ന നിലപാടുകൾ ഒഴിവാക്കണമെന്ന് സമിതി ആവശ്യപ്പെട്ടു.
സമിതിയുടെ വിശദീകരണപ്രകാരം, പറവൂർ സ്വദേശി ഹാഷിം സേട്ടുവിന്റെ മകൻ മുഹമ്മദ് സിദ്ദിഖ് സേട്ടു 1950-ൽ 404.76 ഏക്കർ ഭൂമി ഫറൂഖ് കോളേജ് കമ്മിറ്റിക്ക് ദൈവനാമത്തിൽ വഖഫ് ചെയ്തതാണ്. സമുദായത്തിന്റെ വിദ്യാഭ്യാസ പുരോഗതിക്കായാണ് ഈ ഭൂമി വഖഫ് ചെയ്തതെന്നും സമിതി വ്യക്തമാക്കി.
ജനവാസം കുറവായിരുന്നതിനാലും ഭൂമി ആവശ്യമായ രീതിയിൽ സംരക്ഷിക്കാൻ കഴിയാതിരുന്നതിനാലും ചിലർ ഈ പ്രദേശം പുറമ്പോക്ക് ഭൂമിയാണെന്ന് കരുതി കൈയേറിയതായി സമിതി ആരോപിച്ചു. പിന്നീട് പലതവണ ഭൂമി കൈമാറ്റം ചെയ്ത് കൈവശം ഉറപ്പിച്ചുവെന്നും അവർ പറഞ്ഞു. ഭൂമിയുമായി ബന്ധപ്പെട്ട് നടന്ന വിവിധ കേസുകളിൽ വഖഫ് ഭൂമിയെന്ന നിലയിൽ ഫറൂഖ് കോളേജ് കമ്മിറ്റിക്ക് അനുകൂലമായ വിധികളാണ് ലഭിച്ചതെന്നും, കൈയേറ്റം നടത്തിയവർക്കൊന്നും കോടതികളിൽ നിന്ന് അനുകൂല വിധി ലഭിച്ചിട്ടില്ലെന്നും സമിതി ചൂണ്ടിക്കാട്ടി.
മുനമ്പം എസ്റ്റേറ്റിൽ സർവേ നടത്തി സമഗ്ര അന്വേഷണം നടത്തണം. കൂടാതെ, അവിടെയുള്ള ഏകദേശം 140 യഥാർത്ഥ കുടികിടപ്പുകാരെ കണ്ടെത്തുകയും അവരുടെ പേരിൽ പ്രവർത്തിക്കുന്നതായി പറയുന്ന റിസോർട്ട് മാഫിയയുടെ ഇടപെടലുകൾ പുറത്തുകൊണ്ടുവരികയും വേണമെന്ന് സമിതി ആവശ്യപ്പെട്ടു. വാർത്താ സമ്മേളനത്തിൽ വൈസ് പ്രസിഡന്റ് കെ.പി. ഇസ്മായിൽ, ജനറൽ സെക്രട്ടറി അബ്ദുൾ കാദർ കാരത്തൂർ, ആലിക്കോയ, ടി.പി. അബ്ദുൾ മജീദ്, ഷാഹുൽ ഹമീദ് എന്നിവർ പങ്കെടുത്തു.
