കോഴിക്കോട്: മലബാറിൽ മുസ്ലിം സമുദായത്തിനിടയിൽ കോൺഗ്രസിനെ ശക്തിപ്പെടുത്താനുള്ള ലക്ഷ്യത്തോടെ ദേശീയ മുസ്ലിം ബ്ലോക്ക് രൂപീകരിക്കുന്നു. കോൺഗ്രസിലെ പ്രധാന നേതാക്കളുടെ പിന്തുണയോടെയാണ് ഈ നീക്കം നടക്കുന്നത്.
സ്വാതന്ത്ര്യസമര സേനാനി മുഹമ്മദ് അബ്ദുറഹിമാന്റെ ആശയങ്ങളെയും പ്രവർത്തനങ്ങളെയും പിന്തുടർന്ന് കൂട്ടായ്മ രൂപീകരിക്കുന്നതാണെന്ന് ബന്ധപ്പെട്ടവർ പറയുന്നു. അദ്ദേഹത്തിന്റെ കാലത്ത് ആരംഭിച്ച “അൽ അമീൻ” പത്രം വീണ്ടും വായിക്കപ്പെടുന്ന പരിപാടിയും കോഴിക്കോട് സംഘടിപ്പിക്കുന്നു.
പരിപാടിയിൽ എം.കെ. രാഘവൻ എംപി, ചരിത്രകാരൻ കെ.കെ.എൻ. കുറുപ്പ്, കെപിസിസി മുൻ ട്രഷറർ കെ.കെ. കൊച്ചുമുഹമ്മദ്, എൻ.പി. ചേക്കുട്ടി, പ്രൊഫ. മുഹമ്മദ് ബായിസ്, കെ.എസ്. ഹരിഹരൻ, എ.പി. കുഞ്ഞാമു എന്നിവർ പങ്കെടുക്കും. വൈകിട്ട് കാരാപറമ്പ് അദർ ബുക്സിലാണ് പരിപാടി നടക്കുന്നത്.
മലബാറിൽ മുസ്ലിം സമുദായത്തിനിടയിൽ കോൺഗ്രസിന്റെ സ്വാധീനം കുറയുന്നുവെന്ന വിലയിരുത്തലിന്റെ അടിസ്ഥാനത്തിലാണ് പുതിയ കൂട്ടായ്മ രൂപീകരിക്കുന്നത്. മുസ്ലിം ലീഗ് ശക്തമായ നിലപാടിൽ തുടരുമ്പോൾ കോൺഗ്രസിന്റെ പിന്തുണ വർധിപ്പിക്കുകയാണ് ലക്ഷ്യം.
ദേശീയ ധാരയിൽ ഉറച്ചുനിന്ന കോൺഗ്രസിന്റെ മുസ്ലിം പാരമ്പര്യം വീണ്ടും ഉയർത്തിക്കാട്ടുക എന്നതാണ് കൂട്ടായ്മയുടെ പ്രഖ്യാപിത ലക്ഷ്യം. സംഘടനാ നേതൃത്വത്തിൽ നൗഷാദ് അലി എംഎൽഎ വരാനുള്ള സാധ്യതയുണ്ടെന്ന അഭ്യൂഹങ്ങൾ ഉണ്ടായിരുന്നെങ്കിലും ഔദ്യോഗിക സ്ഥിരീകരണം ഉണ്ടായിട്ടില്ല.
