തിരുവനന്തപുരം: സംസ്ഥാനത്ത് കനത്ത മഴ തുടരുന്ന സാഹചര്യത്തിൽ രക്ഷാപ്രവർത്തനങ്ങളിലും ദുരിതാശ്വാസ പ്രവർത്തനങ്ങളിലും പാർട്ടി പ്രവർത്തകർ സജീവമായി ഇടപെടണമെന്ന് സിപിഐഎം. സംസ്ഥാന സെക്രട്ടേറിയറ്റ് പുറത്തിറക്കിയ പ്രസ്താവനയിലാണ് പ്രവർത്തകർക്ക് നിർദേശം നൽകിയത്.
വിവിധ ജില്ലകളിൽ വെള്ളപ്പൊക്കവും ഉരുൾപൊട്ടൽ ഭീഷണിയും നിലനിൽക്കുന്ന സാഹചര്യത്തിൽ ദുരിതബാധിത പ്രദേശങ്ങളിൽ സിപിഐഎം പ്രവർത്തകർ രക്ഷാപ്രവർത്തനങ്ങളിൽ സജീവമായി പങ്കെടുക്കുന്നുണ്ടെന്നും പ്രസ്താവനയിൽ വ്യക്തമാക്കി.
ദുരിതബാധിതർക്ക് ഭക്ഷണം, കുടിവെള്ളം, മരുന്നുകൾ ഉൾപ്പെടെയുള്ള അവശ്യസാധനങ്ങൾ ലഭ്യമാക്കാൻ പ്രത്യേക ശ്രദ്ധ പുലർത്തണമെന്നും പാർട്ടി നിർദേശിച്ചു. ദുരിതമേഖലകളിൽ ആരും ഒറ്റപ്പെട്ടോ കുടുങ്ങിക്കിടക്കുന്നോ ഇല്ലെന്ന് ഉറപ്പാക്കണമെന്നും പ്രവർത്തകരോട് ആവശ്യപ്പെട്ടു.
അപകടസാധ്യതയുള്ള പ്രദേശങ്ങളിൽ കഴിയുന്നവരെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിക്കുന്ന പ്രവർത്തനങ്ങളിൽ അധികൃതരുമായി സഹകരിക്കണമെന്നും സിപിഐഎം അറിയിച്ചു. മഴ കുറഞ്ഞതിന് ശേഷം തദ്ദേശ സ്വയംഭരണ സ്ഥാപനങ്ങളുമായി ചേർന്ന് ശുചീകരണ പ്രവർത്തനങ്ങളിലും പ്രവർത്തകർ പങ്കാളികളാകണമെന്നും പ്രസ്താവനയിൽ വ്യക്തമാക്കി.
അധികൃതർ നൽകുന്ന മുന്നറിയിപ്പുകളും നിർദേശങ്ങളും കൃത്യമായി പാലിച്ച് സുരക്ഷിതരായിരിക്കാൻ പൊതുജനങ്ങളോടും സിപിഐഎം അഭ്യർത്ഥിച്ചു.
