ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ദില്ലിയിൽ പ്രതിഷേധം ശക്തമാകുന്നു. വിവിധ സംഘടനകളുടെ നേതൃത്വത്തിൽ ഇന്ന് വൈകിട്ട് ഇന്ത്യാ ഗേറ്റ് പരിസരത്ത് നിന്ന് ജന്തർ മന്തറിലേക്ക് ‘സിറ്റിസൻ മാർച്ച്’ നടത്താൻ സാമൂഹിക മാധ്യമങ്ങളിലൂടെ ആഹ്വാനം ചെയ്തിട്ടുണ്ട്.
ഇന്നലെ നടന്ന പ്രതിഷേധത്തിനിടെ പ്രതിഷേധക്കാർക്കും മാധ്യമപ്രവർത്തകർക്കും നേരെ പൊലീസ് മർദനം ഉണ്ടായെന്ന ആരോപണത്തെ തുടർന്നാണ് ഇന്നത്തെ പ്രതിഷേധത്തിന് ആഹ്വാനം ചെയ്തിരിക്കുന്നത്. സംഭവത്തിൽ പ്രതിഷേധം ശക്തമാക്കാനാണ് വിവിധ സംഘടനകളുടെ തീരുമാനം.
അതേസമയം, ചൊവ്വാഴ്ച ഇന്ത്യ സഖ്യത്തിന്റെ നേതൃത്വത്തിൽ കേന്ദ്ര തിരഞ്ഞെടുപ്പ് കമ്മീഷൻ ആസ്ഥാനത്തേക്ക് പ്രതിഷേധ മാർച്ച് നടത്താനും തീരുമാനിച്ചിട്ടുണ്ട്. പത്താം തീയതി സിജെപിയുടെ നേതൃത്വത്തിൽ ജന്തർ മന്തറിൽ പ്രതിഷേധത്തിനും ആഹ്വാനം നൽകിയിട്ടുണ്ട്.
എന്നാൽ ദില്ലിയിൽ നിലവിലുള്ള നിരോധനാജ്ഞയുടെ പശ്ചാത്തലത്തിൽ ജന്തർ മന്തറിലേക്ക് പ്രതിഷേധത്തിനായി ആരെയും കടത്തിവിടില്ലെന്ന നിലപാടിലാണ് ദില്ലി പൊലീസ്. ഇതോടെ വരും ദിവസങ്ങളിൽ തലസ്ഥാനത്ത് പ്രതിഷേധങ്ങൾ ശക്തമാകാനുള്ള സാധ്യതയുണ്ട്.
