ആലപ്പുഴ: അമ്പലപ്പുഴയിലെ യുഡിഎഫ് സ്വതന്ത്ര സ്ഥാനാര്ത്ഥി ജി സുധാകരനും ഡിവൈഎഫ്ഐയും തമ്മിലുള്ള പോര് മുറുകുന്നു. സുധാകരന് അനധികൃതമായി സ്വത്ത് സമ്പാദനം നടത്തിയെന്ന ആരോപണം ഡിവൈഎഫ്ഐ ആവര്ത്തിക്കുകയാണ്. ഇതുസംബന്ധിച്ച വിവരങ്ങള് കിട്ടിയെന്നും ഇപ്പോള് തുറന്നുപറയുന്നില്ലെന്നും ഡിവൈഎഫ്ഐ ജില്ലാ പ്രസിഡന്റ് എസ് സുരേഷ് കുമാര് പറഞ്ഞു.
നാമനിര്ദേശ പത്രിക സംബന്ധിച്ച് തങ്ങള് ഉന്നയിച്ച ആരോപണത്തിന് സുധാകരന് മറുപടി പറയട്ടെ. എന്നിട്ട് ഇനിയും കുറേ കാര്യങ്ങള് വെളിപ്പെടുത്താനുണ്ടെന്നും സുരേഷ് കുമാര് പറഞ്ഞു.
ജി സുധാകരന് വിവിധ ബാങ്കുകളില് അക്കൗണ്ട് ഉണ്ട്. അതിന്റെ വിവരങ്ങള് കൂടി പറയാന് ധൈര്യം വേണം. ഒരു ബാങ്കിലെ വിവരം മാത്രമാണ് ഇപ്പോള് പറയുന്നത്. സുധാകരന്റെ മകന്റെയും മരുമകളുടെയും സ്വത്തുവിവരങ്ങള് പുറത്തുവരട്ടെ. നാമനിര്ദേശ പത്രികയില് കൃത്രിമം കാണിച്ചുവെന്ന പരാതിയില് ഉറച്ചുനില്ക്കുന്നുവെന്നും എസ് സുരേഷ് കുമാര് വ്യക്തമാക്കി.
