ഇസ്ലാമാബാദ്: ദശകങ്ങൾ നീണ്ട നയതന്ത്ര പ്രതിസന്ധികൾക്ക് വിരാമമിട്ടുകൊണ്ട് അമേരിക്കയും ഇറാനും തമ്മിലുള്ള നേരിട്ടുള്ള ഉന്നതതല വെടിനിർത്തൽ ചർച്ചകൾക്ക് പാകിസ്ഥാൻ തലസ്ഥാനമായ ഇസ്ലാമാബാദിൽ തുടക്കമായി. 1979-ലെ ഇസ്ലാമിക് വിപ്ലവത്തിന് ശേഷം ആദ്യമായാണ് ഇരുരാജ്യങ്ങളിലെയും ഉന്നത നേതാക്കൾ ഒരു മേശയ്ക്ക് ചുറ്റുമിരുന്ന് സമാധാന ചർച്ചകളിൽ ഏർപ്പെടുന്നത് എന്നത് ലോകത്തിന് വലിയ പ്രതീക്ഷയാണ് നൽകുന്നത്. അമേരിക്കൻ വൈസ് പ്രസിഡന്റ് ജെ ഡി വാൻസും ഇറാൻ പാർലമെന്റ് സ്പീക്കർ മുഹമ്മദ് ബാഗർ ഗാലിബാഫുമാണ് ഈ ചരിത്രപരമായ കൂടിക്കാഴ്ചയ്ക്ക് നേതൃത്വം നൽകുന്നത്. ആറ് ആഴ്ചയായി തുടരുന്ന യുദ്ധം അവസാനിപ്പിക്കുക എന്ന ലക്ഷ്യത്തോടെ പാകിസ്ഥാൻ പ്രധാനമന്ത്രി ഷെഹ്ബാസ് ഷരീഫ് നടത്തുന്ന മധ്യസ്ഥ ശ്രമങ്ങളാണ് ഈ ചർച്ചകൾക്ക് വഴിയൊരുക്കിയത്.
ചർച്ചകൾ പുരോഗമിക്കവേ, ഇറാൻ പ്രസിഡന്റ് മസൂദ് പെസെഷ്കിയനുമായി ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഫോണിലൂടെ നിർണ്ണായക സംഭാഷണം നടത്തി. മേഖലയിൽ ശാശ്വതമായ സമാധാനം ഉറപ്പാക്കാൻ ഇസ്ലാമാബാദിലെ അവസരം പരമാവധി പ്രയോജനപ്പെടുത്തണമെന്ന് അദ്ദേഹം ഇറാനോട് ആവശ്യപ്പെട്ടു. ഹോർമുസ് കടലിടുക്കിലെ കപ്പൽ ഗതാഗത സ്വാതന്ത്ര്യം പുനഃസ്ഥാപിക്കണമെന്നും ലെബനന്റെ പരമാധികാരം സംരക്ഷിച്ചുകൊണ്ട് അവിടെ വെടിനിർത്തൽ പൂർണ്ണമായി നടപ്പിലാക്കണമെന്നും മാക്രോൺ ഊന്നിപ്പറഞ്ഞു. സൗദി അറേബ്യ ഉൾപ്പെടെയുള്ള ഗൾഫ് രാജ്യങ്ങളുമായി ഫ്രാൻസ് നിരന്തരം ആശയവിനിമയം നടത്തുന്നുണ്ടെന്നും സമാധാന ശ്രമങ്ങൾക്ക് എല്ലാവിധ പിന്തുണയും വാഗ്ദാനം ചെയ്യുന്നതായും അദ്ദേഹം വ്യക്തമാക്കി.
സമാധാന ചർച്ചകൾ ഒരു വശത്ത് നടക്കുമ്പോഴും ഹോർമുസ് കടലിടുക്കിൽ അമേരിക്കൻ നാവികസേന നടത്തുന്ന സൈനിക നീക്കങ്ങൾ ആശങ്കയ്ക്ക് കാരണമാകുന്നുണ്ട്. രണ്ട് അത്യാധുനിക പടക്കപ്പലുകളുടെ സംരക്ഷണത്തിൽ സമുദ്ര മൈനുകൾ നീക്കം ചെയ്യുന്ന നടപടി ആരംഭിച്ചതായി അമേരിക്കൻ സെൻട്രൽ കമാൻഡ് അറിയിച്ചു. സുരക്ഷിത യാത്ര ഉറപ്പാക്കാനാണ് ഈ നീക്കമെന്ന് അമേരിക്ക അവകാശപ്പെടുമ്പോഴും, ചർച്ചകൾക്കിടയിലുള്ള സൈനിക ബലപ്രയോഗം സംഘർഷാവസ്ഥ വർദ്ധിപ്പിക്കുമോ എന്ന ഭീതിയിലാണ് ലോകം.
ആണവ, സാമ്പത്തിക, സൈനിക മേഖലകളിലെ വിദഗ്ധരും ഇരു രാജ്യങ്ങളെയും പ്രതിനിധീകരിച്ച് ചർച്ചകളിൽ പങ്കെടുക്കുന്നുണ്ട്. ചർച്ചകൾ വിജയകരമായാൽ ഉടൻ തന്നെ സാങ്കേതിക കരാറിന് അന്തിമ രൂപം നൽകുമെന്ന് ഇറാൻ വ്യക്തമാക്കിയിട്ടുണ്ട്. എന്നാൽ മുൻ അനുഭവങ്ങളുടെ പശ്ചാത്തലത്തിൽ, ചർച്ചയുടെ മറവിൽ അപ്രതീക്ഷിത ആക്രമണങ്ങൾ ഉണ്ടാകുമോ എന്ന ജാഗ്രതയും ഇറാൻ പുലർത്തുന്നുണ്ട്. വരും ദിവസങ്ങളിലും ചർച്ചകൾ തുടരുമെന്നാണ് റിപ്പോർട്ടുകൾ സൂചിപ്പിക്കുന്നത്.
