ഗാസ സിറ്റി: ഗാസയിലെ ബുറൈജ് അഭയാർഥി ക്യാമ്പിൽ ഇസ്രയേൽ നടത്തിയ ഡ്രോൺ ആക്രമണത്തിൽ അൽ ജസീറ ക്യാമറാമാനായ അഹമ്മദ് വിഷാ ഉൾപ്പെടെ ആറുപേർ കൊല്ലപ്പെട്ടു. ശനിയാഴ്ച നടന്ന ആക്രമണത്തിൽ രണ്ട് കുട്ടികളും മരിച്ചതായി റിപ്പോർട്ടുകളുണ്ട്.
ഗാസ യുദ്ധം ആരംഭിച്ചതിന് ശേഷം അൽ ജസീറ മാധ്യമസംഘത്തിൽ നിന്ന് കൊല്ലപ്പെടുന്ന ഏറ്റവും പുതിയ അംഗമാണ് അഹമ്മദ് വിഷായെന്ന് ചാനൽ അറിയിച്ചു.
ആക്രമണത്തിന്റെ ഉത്തരവാദിത്തം ഇസ്രയേൽ സൈന്യം ഏറ്റെടുത്തിട്ടുണ്ട്. എന്നാൽ അഹമ്മദ് വിഷാ ഹമാസ് പ്രവർത്തകനായിരുന്നുവെന്നാണ് ഇസ്രയേൽ സൈന്യത്തിന്റെ ആരോപണം. അൽ ജസീറയിൽ ഫോട്ടോ മാധ്യമപ്രവർത്തകനായി ജോലി ചെയ്തിരുന്ന അദ്ദേഹം ഹമാസിന്റെ സായുധ വിഭാഗത്തിൽ സ്നൈപ്പറായും പ്രവർത്തിച്ചിരുന്നുവെന്ന് സൈനിക വക്താവ് അവകാശപ്പെട്ടു. എന്നാൽ ഈ ആരോപണങ്ങൾ സാധൂകരിക്കുന്ന തെളിവുകളൊന്നും ഇതുവരെ ഇസ്രയേൽ പുറത്തുവിട്ടിട്ടില്ല.
ഇസ്രയേൽ സൈന്യത്തിനെതിരായ സ്നൈപ്പർ ആക്രമണങ്ങൾ ആസൂത്രണം ചെയ്യുന്നതിൽ വിഷാ പങ്കാളിയായിരുന്നുവെന്നും സൈനികർക്കുള്ള ഭീഷണി ഒഴിവാക്കാനാണ് ലക്ഷ്യമിട്ടുള്ള ആക്രമണം നടത്തിയതെന്നുമാണ് ഇസ്രയേലിന്റെ വിശദീകരണം. അഹമ്മദ് വിഷായ്ക്ക് പുറമെ രണ്ട് ഹമാസ് അംഗങ്ങളും ആക്രമണത്തിൽ കൊല്ലപ്പെട്ടതായി സൈന്യം അവകാശപ്പെടുന്നു.
അതേസമയം, മാധ്യമപ്രവർത്തകരെ ലക്ഷ്യമിട്ടുള്ള ആക്രമണങ്ങളെ ന്യായീകരിക്കാനുള്ള ശ്രമമാണ് ഇത്തരം ആരോപണങ്ങളെന്ന് വിമർശനം ഉയരുന്നുണ്ട്. നിരായുധരായ മാധ്യമപ്രവർത്തകരുടെ സുരക്ഷയെക്കുറിച്ചുള്ള ആശങ്കകളും ഇതോടെ വീണ്ടും ശക്തമായിട്ടുണ്ട്.
അഹമ്മദ് വിഷായുടെ കുടുംബത്തെ ബാധിക്കുന്ന രണ്ടാമത്തെ വലിയ ദുരന്തമാണിത്. അൽ ജസീറയിൽ തന്നെ പ്രവർത്തിച്ചിരുന്ന അദ്ദേഹത്തിന്റെ സഹോദരൻ മുഹമ്മദ് വിഷാ കഴിഞ്ഞ ഏപ്രിലിൽ കൊല്ലപ്പെട്ടിരുന്നു. വാഹനത്തിൽ സഞ്ചരിക്കവേ നടന്ന ഇസ്രയേൽ ഷെല്ലാക്രമണത്തിലാണ് മുഹമ്മദ് മരിച്ചത്.
2023 ഒക്ടോബറിൽ ഗാസ യുദ്ധം ആരംഭിച്ചതിന് ശേഷം 220-ലധികം മാധ്യമപ്രവർത്തകർ കൊല്ലപ്പെട്ടതായാണ് അന്താരാഷ്ട്ര കണക്കുകൾ വ്യക്തമാക്കുന്നത്. ഇതിൽ 70-ഓളം പേർ ഔദ്യോഗിക മാധ്യമപ്രവർത്തന ചുമതലകൾ നിർവഹിക്കുന്നതിനിടെയാണ് കൊല്ലപ്പെട്ടതെന്നും റിപ്പോർട്ടുകൾ സൂചിപ്പിക്കുന്നു.
