തിരുവനന്തപുരം: കേരള സർവകലാശാലയുടെ പരീക്ഷാ ചോദ്യപേപ്പറിൽ ഗുരുതര പിഴവ്. ചോദ്യത്തോടൊപ്പം അതിന്റെ ഉത്തരവും അച്ചടിച്ച നിലയിലാണ് ചോദ്യപേപ്പർ വിതരണം ചെയ്തത്. ഇന്ന് നടന്ന ബിഎസ്.സി രണ്ടാം സെമസ്റ്റർ സ്റ്റാറ്റിസ്റ്റിക്സ് പരീക്ഷയുടെ ചോദ്യപേപ്പറിലാണ് പിഴവ് കണ്ടെത്തിയത്. അഞ്ചാം ചോദ്യത്തിനൊപ്പമാണ് അതിന്റെ ഉത്തരവും അച്ചടിച്ചിരുന്നത്.
സംഭവം ശ്രദ്ധയിൽപ്പെട്ടതോടെ പരീക്ഷാ കൺട്രോളർ അന്വേഷണം നടത്തുമെന്ന് അറിയിച്ചു. വിഷയത്തിൽ ബോർഡ് ഓഫ് എക്സാമിനേഷനോട് വിശദീകരണവും തേടിയിട്ടുണ്ട്. പരീക്ഷാ നടത്തിപ്പിലെ ഈ വീഴ്ച വിദ്യാർത്ഥികൾക്കിടയിൽ ആശങ്കയ്ക്ക് ഇടയാക്കിയിട്ടുണ്ട്. സംഭവത്തിന്റെ കാരണം കണ്ടെത്താനും ആവശ്യമായ നടപടികൾ സ്വീകരിക്കാനുമാണ് സർവകലാശാലയുടെ തീരുമാനം.
